39. sokołski wolejbulowy turněr wo pokal Dowowiny

Wolejbulowy turněr Serbskich Sokołow wo pokal Domowiny zašłu sobotu w Radworju měješe z mustwom šulerjow dźesateho lětnika Serbskeje wyšeje šule „Michał Hórnik“ Worklecy a z Kralec swójbnymaj cyłkomaj ze Šunowa nowačkow. Přirunujo z turněrom loni w sportowni Serbskeho gymnazija Budyšin běchu štyri cyłki wjac. Rjenje tež bě, zo hraještej studentskej mustwje Bjarnat Krawc Drježdźany a Sorabija Lipsk sobu, a zo měještej wobaj tež hru wo sedme městno mjez sobu, kotruž rozsudźichu Lipšćenjo z 12:8 a 12:4 za sebje.

W předkole, při překřižnych hrach a tež při zaměstnjenskich hrach hraješe so stajnje hač do 12 dypkow. Prawidło dwaj dypkaj rozdźěla bu wusadźene, tak zo skónčichu so cyłkownje pjatnaće hrow při stawje 12:11. Najwuši duel nasta w skupinje A mjez mustwom 11./12. lětnika Serbskeho gymnazija Budyšin a Bratrowstwom Róžant. Prěnju sadźbu dobychu gymnaziasća z jednym dypkom rozdźěla, dalšu pak Róžeńčenjo ze samsnym­ stawom.