W Budyšinje swjeći dźensa bywši mnoholětny načolny sobudźěłaćer Ludoweho nakładnistwa Domowina Helmut Haza swoje dźewjećdźesaćiny. Do Hazec serbskeje swójby w Pomorcach je so jubilar 21. julija 1935 narodźił. Jeho nan Gusta Haza bě pozdźišo wjesnjanosta, hibićiwy předsyda tamnišeje Domowinskeje skupiny a tójšto lět tež ze županom Budyskeje župy „Jan Arnošt Smoler“. Syn Helmut maturowaše na Budyskej Serbskej wyšej šuli. Po tym koordinowaše wón dwě lěće w Berlinskim pedagogiskim nakładnistwje Volk und Wissen dźěło z Budyskej redakciju serbskich wučbnicow.