Nowe Jěžercy (SN/bn). Finisaža wustajeńcy lětušeje „Koalizije wuměłstwow (Kodekü)“ (SN rozprawjachu) přiwabi předwčerawšim něhdźe 70 zajimcow do Kulturneje fabriki Lina Koch w Nowych Jěžercach (Neugersdorf). Dohromady 16 wuměłčow a wuměłcow z Němskeje, Awstriskeje, Nižozemskeje a Pólskeje je w běhu dweju tydźenjow najwšelakoriše twórby zwoprawdźiło, při čimž tworjachu stawizny wustajenišća jako bywša zhotowjernja tekstilijow takrjec čerwjenu nitku. Mjez druhim nastaštej wobchodźujomnej instalaciji „Verstrickte Sache“, kotruž bě rězbarka Cvetanka Kirilova Schnorrbusch zhromadnje z lokalnym plećenskim kołom Treff 47 zrealizowała, a „Hudźba přichoda“ Tonija Buféja, zmóžnjaca symboliske wuchodźowanje po swojich mozach. Schody fabriki pyša wotnětka portrety bywšich sobudźěłaćerkow, kotrež bě Helena Zubler na zakładźe jich dopomnjenkow a fotografijow zdźěłała.