Pólska ameriskich wojakow za škit přećiwo Ruskej wutrobnje witała

Waršawa. Z wulkej swjatočnosću witachu w Pólskej minjenu sobotu 3 500 wojakow USA, kotrychž bě wojerski zwjazk NATO pósłał, zo bychu kraj před móžnym nadpadom Ruskeje škitali. Jedna so wo tankowu jednotku, kotraž bě dotal w zwjazkowym staće USA Colorado zaměstnjena.

Na swjatočnosći w zapadopólskim Żaganju wobdźělištaj so ministerska prezidentka Beata Szydło a zakitowanski minister Antoni Macierewicz. Premierka Szydło z chwalbu njelutowaše: „Je to wulki dźeń, zo móžemy na pólskej zemi reprezentantow najsylnišeje a najwulkotnišeje armeje swěta witać.“ Minister Macierewicz­ rjekny: „Smy lětdźesatki na was čakali. Móžna agresija Ruskeje je za Krjeml nětko wo wjele riskantniša.“

Zarjadowanja podobneho razu wotměchu so w 15 dalšich městach, mjez druhim we Waršawje, Krakowje, Katowicach a Wrócławju. Orchester wójska hraješe wojersku hudźbu a poskićeše wobydlerjam hrochowu poliwku. Přez wulke widejosćěny běchu originalnje z centralnej swjatočnosću w Żaganju zwjazani.