Mało serbskich sportowcow w Moritzburgu startowało
Při perfektnym wjedrje startowachu njedźelu dopołdnja serbscy triatleća do lětušeje sezony. Hnydom wjacori Serbja pak z najwšelakorišich přičin pódla njeběchu. Beno Šołta z Miłoćic braščeše na serbskim kwasu, Daniel a Tomaš Matka dyrbještaj w nocy do toho dźěłać. Cyłkownje 500 atletow poda so rano w dźewjećich po tradicionalnym wutřělu z kanony do Moritzburgskeho hrodoweho hata na olympisku distancu. Wysokeje wodoweje temperatury dla běše neoprenowy płuwanski woblek zakazany. Nimo rutinjejow přicpěwa sej lěto wob lěto tež wosebje wjele nowačkow naročnu distancu. Tak wobdźěli so Chróšćan Michał Šrajer prěni raz na olympiskim triatlonje (1,5 km płuwać – 40 km kolesować – 10 km běžeć). Po 2:48:21 hodź přiběža wón po čerwjenym přestrjencu do cila. Napjaty duel wo krónu najspěšnišeho Serba wuwojowaštaj Marian Žur z Lejna a Silvio Bjarš z Budyšina. Wo jeničce poł mjeńšiny běše Budyšan spěšniši, štož zaležeše wosebje na lěpšimaj změnomaj.