Knježaca strona PiS: Sudnistwo ma tajke być, kaž my to chcemy
Waršawa. Pólska knježerstwowa strona Prawo a sprawnosć (PiS) tłóči na tempo. Wona planuje radikalnu změnu sudnistwa na wšěch runinach. PiS chce swoje zaměry ručež móžno přesadźić. Wo tym swědči diskusija, kotruž wjedźeše tele dny wotpowědna justicna komisija pólskeho sejma. Tu běchu w juliju wutworili, po tym zo njebě prezident Andrzej Duda předpołoženemu dokumentej bjez wobmjezowanja přihłosował. Akceptujo jenož dwaj z třoch dypkow bě wón dalše postupowanje blokował. Porno tomu namjetuje prezident nowu instituciju, kotraž kontroluje dźěławosć sudnikow, prawiznikow a notarow.
