Moskwa (ČŽ/K/SN). Ruska poněčim wote­mrěwa. Hižo štwórte lěto zasobu je tam wjele wjace ludźi zemrěło, hač dźěći na swět přišło. Lětsa budźe diferenca wjetša hač 200 000. „Ruska populacija katastrofalnje woteběra“, cituje čěski dźenik Mladá fronta dnes naměstnicu premiera Tatjanu Golikowu. Kónc lěta změje Ruska po trochowanju domoródnych statistikarjow njecyłych 147 milionow wobydlerjow. Do ličby su tež 12,3 miliony wobydlerjow połkupy Krim zapřijate. Po wobličenjach UNO móhła ludnosć Ruskeje hač do kónca lětstotka pod 100 milionow spadnyć, niskeje kwoty porodnosće a nic naposledk njepřestajneho wotchada mnohich Rusow dla.