Zdypkomsezonu zahajili

srjeda, 16. septembera 2020
artikl hódnoćić
(0 )
Rumy w srjedźnym polu běchu w zazběhowej hrě Njebjelčanow přećiwo hosćom z  Wulkeje Dubrawy chětro wuske. Tu spyta sej Jurij Haška (druhi wotlěwa, Njebjelčicy) bul wulišćić.  Foto: Konstantin Hrjehor Rumy w srjedźnym polu běchu w zazběhowej hrě Njebjelčanow přećiwo hosćom z Wulkeje Dubrawy chětro wuske. Tu spyta sej Jurij Haška (druhi wotlěwa, Njebjelčicy) bul wulišćić. Foto: Konstantin Hrjehor

SJ Njebjelčicy – ST 1896 Wulka Dubrawa 1:1 (0:0)

Zestawa SJN: Matješk – Reinelt, Hanuza, Šołta, O. Domš, Pawlik, Haška, Hrjehor, Plaettner (46. Malaškin), F. Domš (68. Čornak), Korjeńk

Tež w Njebjelčicach zaso wo dypki za bulom honja. Přihladowarjam w zazběhowej domjacej hrě přećiwo ST Wulkej Dubrawje skićeše so wot spočatka dobra atmosfera. Za hrajerjow Njebjelčanskeje SJ započa so partija z wulkej napjatosću. Oliver Domš bu wot Chrystofa Pawlika na lěwej stronje na zakładnu liniju pósłany. Pawlikowu flanku pak njemóžachu w centrumje wužić. Ronny Hanuza bě so jako kótwica w defensiwje čerwjeno-běłych ze swojimaj wonkownymaj škitarjomaj Clemensom Reineltom a Jakubom Šołtu wot prěnjeje mjeńšiny na konsekwentne zakitowanje dojednał. Domjacy mějachu w swójskej połojcy wjele městna, dokelž běchu Wulkodubrawčenjo chětro defensiwnje nastajeni a spytachu so do strašneje cony přećiwnika wosebje přez křidle dóstać. W 30. min. spózna William Plaettner hasku do šěsnatki a pósła agilneho Pawla Hrjehorja z křidła do běha. Hrjehor pak trjechi jenož wonkowny sak wrotow. Krótko do přestawki spózna Plaettner w škiće hosći dalšu dźěru. Handrij Korjeńk nahły bul w šěsnatce doběža, wrotar pak bě w samsnym wokomiku na městnje a sej jón zaso ­zawěsći.

Po přestawce bě partija podobna kaž w prěnjej połojcy. Dołhe třělwy hrajny wotběh mylachu a swobodne rumy w centrumje běchu wuske a njepřewidne. W 57. min. hosćo z małej pasowej stafetu přez Tonija Rudolfa w centrumje bul ze swójskeje połojcy wuswobodźichu. Dominic Nowak bě w prawym wokomiku startował. Na kromje šěsnatki bu wón nahle pósłany. Wrotar Józef Matješk bě w samsnym času na městnje a jeho myleše. Njehladajcy toho so přećiwniski nadběhowar wuspěšnje zwjertny a na zakładnu liniju přeběža. Wottam bě puć do šěsnatki a na wrota swobodny. Bul přeprěči wrotowu liniju před přiběžacym škitarjom k 0:1 (57.). Njebjelčanam pobrachowaše w akcijach přez křidle stajnje finalny pas. Oliver Domš a Pawl Hrjehor njezamóštaj so časćišo přez wusko stejacu defensiwu předrěć. Tuž wrotar Matješk kontery zas a zaso tež z dołhimi kopami zahaji. Jedyn tajki bě wuspěšny. Matješk pósła Korjeńka do šěsnatki, hdźež wuži nadběhowar njedorozumjenje mjez wrotarjom a pod ćišć stajenym škitarjom z Wulkeje Dubrawy. A Korjeńk suny bul k 1:1 do syće (75.). Hra wosta dwubojow dla hač do kónca napjata. Jurij Haška

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND