Němske narodne mustwo žonow je z wulkotnym wukonom do swětoweho koparskeho mišterstwa startowało a njewostaji wubrance kraja Marokko při 6:0 triumfje žanu šansu. Kapitanka Alexandra Popp při tym ze swojimi dwojimi wrotami puć runaše.

Z dobrej hrajnej kontrolu kombinowaše so wubranka DFB wot spočatka sem wušiknje přez wuske rjećazy Marokkočankow, prěnje přibliženje k wrotam přez Klaru Bühl pak wosta hišće bjez wuspěcha. Tola hižo w 11. min. so suk torhny. Po flance Kathrin Hendrich skoči Popp w šěsnatce najwyše a zhłójčkowa mócnje k 1:0 do wrotow. Tež defensiwnje agěrowaše němski team jara kedźbliwje, pressing fungowaše runje tak derje kaž zawěsćenje konterow.

Po dobrej spočatnej fazy němska hra po 20 mjeńšinach trochu wosłabi. Žony DFB partiju drje dale dominowachu, njepřińdźechu pak strašnje před wrota wrotarki Khadija Er-Rmichi, doniž Popp znowa njetrjechi, jako wona bul po róžku Bühl artistisce z chribjetom k wrotam a z hłowu do saka stłóči (39.). Z wulce zasłuženym 2:0 dźěchu Němki do kabiny.