Łužiske lodohokejowe liški su dalšeho nadběhowarja angažowali. Christoph Kiefersauer změni wot Bayreuth Tigers do Běłeje Wody k Liškam.

Rodźeny Bad Tölzski započa z lodohokejom w swojim ródnym měsće a přeběža tam wšitke ­dorostowe mustwa. Wón wobdźěli so z němskim U18 kaž tež z U20 na cyłkownje třoch turněrach swětoweho mišterstwa. 2016 bě Kiefersauer do Ingolstadta do DEL změnił a hraješe ze spěchowanskej licencu za ESV Kaufbeuren. Za ERC Ingolstadt absolwowaše tehdy 19lětny w swojej prěnjej profijowej sezonje 15 hrow, mjeztym zo steješe w Kaufbeurenje jónu na lodźe. Tež w slědowacej hrajnej dobje zasadźi so za tři hry w Ingolstadće. K sezonje 2018/2019 přeńdźe wón k Deggendorfskemu SC do DEL2. ­Hižo lěto pozdźišo hraješe wón za swoje domizniske towarstwo, za Tölzske lawy.