Marek Krawc rozprawja wo aktualnje rozjimanych temach w Čěskej

Praha. Před dwěmaj tydźenjomaj hordźeše so Filip Turek na Instagramje we wšelakich widejach ze swojim Ferrarijom. Turek je bywši awtowy wubědźowar a tuchwilu zapósłanc prawicarskeje frakcije „Patrioća za Europu“ w Europskim parlamenće. Zo ma Ferrari, za njeho snano ničo wosebiteho njeje. Zo pak je z wjace hač 320 kilometrami w hodźinje po puću był, zajimuje nětko zastojnikow policije. 39lětny politikar twjerdźi, zo je widejo na awtodróze blisko Mnichowa natočił. Wužiwarjo interneta pak spóznachu awtodróhu D5 blisko Plzenja. To­hodla přepytuje čěska policija nětko zajima­wy pad. „Za překročenje předpisaneje spěšnosće wo wjace hač 50 km/h zwonka gmejnow hrozytej wodźerjej chłostanskoprawniske jednanje a pjenježna pokuta mjez 7 000 a 25 000 krónow (280 do 1 000 eurow). Tež zakaz wodźenja awtow mjez 6 do 18 měsacow jemu kiwa“, zdźěli Josef Bocán, rěčnik policajskeho prezidija. Nimo toho wuchadźa policija z toho, zo je Turek swój tachometer za čas wodźenja sam fotografował.