Pólski ministerski prezident Donald Tusk podpěru koalicije dóstał

Waršawa. Wothłosowanje wo prašenju dowěry předwčerawšim, srjedu, w pólskim sejmje bě w prěnim rjedźe naležnosć politiski přichod ministerskeho prezidenta Donalda Tuska nastupajo. Poražka liberalneho kandidata, Waršawskeho wyšeho měšćanosty Rafała Trzaskowskeho, we wólbach prezidenta 1. junija bě naposledk zdobom poražka Tuska. Tón nima so nětko jenož na „blokadu pre­zidentskeho palasta“ z nowym prezi­dentom Karolom Nawrockim nastajić. Za kulisami dawaja mnozy Tuskej sobuwinu na poražce Trzaskowskeho, wšako je ministerski prezident jako nawoda knježerstwa najwyši zastupnik politi­skeje Waršawy. „Pod tutymi wumě­njenjemi njemóžu hižo dlěje knježić“ bě facit Tuska. Wón chcyše wědźeć, hač ma po zwrěšćenych prezidentskich wólbach scyła hišće podpěru swojeje koalicije. Njeby-li ju wjace měł, by dyrbjał wot­stupić, a z nim wšitcy ministrojo knje­žerstwa.