Lětadle Bratisławskeho knježerstwa staćanow kraja domoj přiwjezli

Bratislava/Berlin (dpa/SN). Słowakska zasadźuje wot wčerawšeho dwě lětadle knježerstwa, zo by swojich staćanow a dalšich wobydlerjow EU z Israela ewakuowała. Tole zdźěla wonkowne ministerstwo kraja w Bratisławje. Dokelž su israelske lětanišća zawrjene, wužiwatej słowakskej mašinje lětanišća w Jordaniskej a Cypriskej. Z prěnjej mašinu je wčera wječor 73 pasažěrow w Bratisławje ­přizemiło. Mjez nimi bě 30 słowakskich staćanow a 43 wobydlerjow dalšich krajow EU kaž Čěskeje, Pólskeje a Awstriskeje. Na lětanišću wočakowachu jich wonkowny minister, nutřkowny minister a zakitowanski minister Słowakskeje.