Marek Krawc rozprawja wo aktualnje rozjimanych temach w Čěskej
Praha. Wjacori Češa su tuchwilu w Israelu a chcedźa wojerskich rozestajenjow z Iranom dla kraj wopušćić. Tuchwilu pak njeje móžno, zo so z Israela z lětadłom do Čěskeje wróća. Tohodla pytaja čěscy politikarjo za móžnosćemi swojich staćanow ewakuować. Póndźelu rano jědźechu někotre busy z Tel Aviva do Egyptowskeje. W nich sedźachu wubojani ludźo. Čěske knježerstwo bě lětadło do Scharm-el-Scheicha pósłało. Wěstotnych přičin dla pak zatajichu drobnosće wo wuchowanskej akciji. Wječor we wosmich pak zběhnje so lětadło skónčnje do powětra. „Ludźo w lětadle běchu jara wolóženi, zo smědźachu so domoj wróćić. Hišće w samsnej nocy w Čěskej přizemichu“, zdźěli Cyril Bumbálek, zastupowacy wulkopósłanc w Israelu.
Po systemje Drozd čěskeho wonkowneho ministerstwa, do kotrehož móža so pućowacy we wukraju zapisać, je tuchwilu 144 čěskich staćanow w nadpadnjenym kraju. Jenož 70 z nich wróćichu so do domizny. Ći tamni dale čakaja a so na dalši ewakuaciski lět nadźijeja.
