Pólska swojich krajanow z Israela ewakuuje a pyta za přičinami konflikta

Waršawa. Tež w Pólskej su wěriwi wčera dźeń Božeho ćěła woswjećili. Po wšěm kraju wotměchu so wulke procesiony z tysacami wěriwych. Puće procesionow běchu z kwětkami pokryte, města a wsy wupyšene. Po Božich mšach zhromadźichu so swójby na piknik. Wšako je dźeń za wšěch Polakow swobodny.

Swjatočna nalada pak je lětsa zaćěmnjena, po tym zo je wójna mjez Israelom a Iranom wudyriła. W srjedźišću rozprawnistwa medijow steji ewakuowanje pólskich staćanow z Israela, hdźež iranske rakety rozbuchuja. Dźakownje wo tym pisaja, zo je Słowakska z prěnim lětadłom nimo swojich staćanow tež 15 Polakow do Bratislavy přiwjezła. Mjeztym je Pólska sama započała swojich ludźi z Israela wuchować. Mašiny startuja w jordaniskej stolicy Ammanje, 160 kilometrow wot Tel Aviva zdalenej.