Marek Krawc rozprawja wo aktualnje rozjimanych temach w Čěskej
Praha. Čěski premierminister Petr Fiala je měnjenja, zo wohrožuje atomowy program iranskeho knježerstwa mjezynarodnu wěstotu. Tohodla je jasne, zo chcedźa USA ze swojimi nalětami twarej atomowych brónjow zadźěwać, zdźěli Fiala zašłu njedźelu na platformje X. W nocy na njedźelu bě USA tři atomowe zawody w Iranje bombardowała. Tež zakitowanska ministerka Jana Černochová měni, zo je skónčenje atomoweho programa njewobeńdźomne za wěstotu Europy a Čěskeje. Jan Lipavský wonkowny minister je podobneho měnjenja. „Wobkedźbujemy situaciju w Bliskim Wuchodźe z wulkim zajimom a podpěramy diplomatiske rozrisanje“, podšmórny Lipavský w Brüsselu. Na wjeršku wonkownych ministrow w belgiskej stolicy wuradźowachu politikarjo mjez druhim wo prašenju, hač přeńdźe Israel ze swojim postupowanjom w Gazaskim pasmje přećiwo čłowjeskim prawam. Wšako su česćenje tutych w asociěrowanskim zrěčenju mjez Europskej uniju a Israelom zakótwili.
