Republika Tatarstan rozpřestrěwa so při srjedźnym toku rěki Wolgi. Na přestrjeni 68 000 km² su tule štyri miliony wobydlerjow žiwi. Hladajo na narodnostnu zestawu regiona maja Tatarojo snadnu wjetšinu (54 %), druhi najwjetši etniski cyłk pak su tule Rusojo (40 %).
Wot połojcy 16. lětstotka su Tatarow poněčim do ruskeho mócnarstwa integrowali. Wosebity narod pak njeje swoju identitu, tradicije a rěč zhubił. W socialistiskim času rusifikacija a rěčna asimilacija přiběraštej.
