Marek Krawc rozprawja wo aktualnje rozjimanych temach w Čěskej

Praha. Dnja 28. februara, krótko po napoł dwanaćich, bě w Hustopečach nad Bečvou nakładny ćah z kolijow wuskočił. 15 z 17 kotołowych wagonow je so dospołnje wotpaliło. Na zbožo so při njezbožu nichtó njezrani, za to pak wuběžachu sta tonow jědojteho bencola do wobswěta. Štwórtk tydźenja zdźěli Miriam Loužecká, rěčnica Čěskeje wobswětoweje inspekcije (ČIŽP), zo bě tuta katastrofa w Husto­pečach nad Bečvou podawk, kotryž nima w swěće swojeho runjeća. Do dźensnišeho wotstronjeja fachowcy jěd z wokoliny dwórnišća. To woznamjenja, zo je přeco hišće zakazane, zo so městnu njezboža bližiš. Znajmjeńša hač do 24. septembra płaća tam krute wěstotne prawidła.