Ruske truty pólsku zjawnosć w dotal njeznatej měrje znjeměrnjeja
Waršawa. Podawk wokoło pozdatnych ruskich trutow w Pólskej medije kraja njesměrnje zaběra. Z wulkimi pismikami a wotpowědnymi fotami rozprawjeja wosebje bulwarne nowiny wo najnowšim wuwiću, při čimž z dramatiskimi přiwótřenjemi njelutuja.
Po dotalnych informacijach zličichu 19 trutow nad Pólskej, štyri z nich su wottřělili. Fachowcy su sej wěsći, zo přilećachu ze susodneje Běłoruskeje, hdźež wotměwa so wot dźensnišeho wulki wojerski manewer. Běłoruska twjerdźi, zo je Pólsku wo tym informowała, zo je skupina trutow mylnje po puću do Pólskeje. Do Waršawy tajke warnowanje po swójskich wuprajenjach ženje dóšło njeje. Nowiny wozjewjeja karty, kotrež manewer w susodnym kraju dokumentuja, a zdobom warnuja, zo móže so tajke wojerske zwučowanje tež spěšnje na nadpad na susodny kraj Pólsku wuwić.
