Marek Krawc rozprawja wo aktualnje rozjimanych temach w Čěskej

Praha. Čěski prezident Petr Pavel je ­Andreja Babiša wutoru tydźenja jako noweho premierministra susodneho kraja spřisahał. Na krótkim swjatočnym zarjadowanju přispomni Pavel, zo bě sej Babiš sam puć za swoje pomjenowanje rubał. Nowy premier bě mjenujcy tydźeń do ­toho rozrisanje za hrožacy konflikt za­jimow wozjewił. Wón chce swój koncern Agrofert do njewotwisneho rukowaćelstwa přetworić. Tak njezměje čas žiwjenja hižo kontrolu nad koncernom.

Petr Pavel podšmórny, zo wočakuja Babiša a jeho knježerstwo ćežke časy. „Dyrbimy cyły retomas problemow rozrisać, a to njebudźe so wobydlerjam ­našeho kraja lubić. Rozrisanja žadaja sej wiziju a zmužitosć. Nimo toho njesměmy na swojich partnerach w EU a NATO dwělować“, přispomni prezident. Njezaběrajo so ze słowami Pavela zdźěli Babiš: „Slubju wšěm wobydlerjam, zo budu za jich zajimy wojować, a to nic jenož doma, ale wšudźe na swěće. Budu za to wojować, zo stanje so Čěska z najlěpšim městnom na našim planeće a zo naša politika wšěm wobydlerjam tyje.“