Marek Krawc rozprawja wo aktualnje rozjimanych temach w Čěskej

Praha. Wjetšina wobydlerjow Čěskeje wočakuje, zo budźe lěto 2026 runje tak dobre kaž zašłe, snano samo hišće lěpše. Nimale 80 procentow ludźi wuchadźa w nowym lěće z pozitiwneho wuwića, skoro połojca Čechow liči samo z polěpšenjom swojeho žiwjenja, zwěsćichu slědźerjo woprašowarnje NMS. Tři lěta mjeztym naladu ludźi w susodnym kraju přepytuja a lětsa su sej přezjedni, zo je to najlěpši wuslědk tutych třoch lět. Ale je tež ludźi, kiž tak optimistisce do přichoda njehladaja. „To su zwjetša ludźo, kiž su sami a nimaja swójbu abo přećelow. Smy so do hód ludźi prašeli, kak swjate dny swjeća a wuslědk je, zo su ludźo, kotřiž bjez swójbnych swjeća, bóle pesimistiscy“, wě Tereza Friedrichová wot NMS.