Za kolije, brónje a měr chce Pólska pjenjezy a idealizm nałožować
Waršawa/Rom/Berlin/Brüssel (dpa/SN). Němska a Pólska so wo krótše jězbne časy na wažnych čarach mjez krajomaj prócujetej. Zwiski na kolijach chcedźa zamołwići zaměrnje dale wutwarjeć. Zwjazkowy minister za wobchad Patrick Schieder (CDU) a pólski minister za infrastrukturu Dariusz Klimczak staj we Waršawje wotpowědne zrěčenje podpisałoj, zdźěla němske wobchadne ministerstwo. Wzajomny cil je, rozšěrić zwiski za pasažěrow a twory. W zdźělence mjenuja so zwiski mjez Waršawa–Berlin, Kraków–Wrócław–Zielona Góra–Berlin, Gdańsk–Szczecin–Berlin kaž tež Przemyśl–Kraków–Wrócław–Lipsk. Nimo toho chcedźa potencial planowanych koridorow za wysoke spěšnosće analyzować. Minister Schnieder rjekny, zo z dojednanjom „fundament za spěchowanje wobchada na kolijach mjez Němskej a Pólskej“ kładu. Minister Klimczak rjekny, zo běštej loni něhdźe 1,2 milionaj ludźi mjez krajomaj pućowałoj.
