Marek Krawc rozprawja wo aktualnje rozjimanych temach w Čěskej

Praha. Dźeń a wjace čěskich piwarnjow wari piwo, kotrež wobsahuje mjenje cokora a alkohola. Njedawno předstaji nowinarska agentura ČTK Žanetu Petružalkovu młodu piwarsku mišterku, kotraž dźěła w małej zapadočěskej piwarni Zlatá kráva (Złota kruwa). „Naše piwo ‚Low Carb Ale’ z mało kalorijemi so jara derje do moderneho swěta hodźi, w kotrymž je sport mnohim młodym ludźom přewšo wažny. Chodźa wjac króć wob tydźeń do fitnesoweho centera. Po treningu nochcedźa piwo pić, kotrež wobsahuje na 100 mililitrow 250 kalorijow. Tohodla smy lochke piwo wuwili. To je tak fermentowany napoj, zo je w nim lědma hišće cokora, přiwšěm pak 3,2 procentaj alkohola. Naše moto je: Pij piwo bjez špatneho swědomja“, Žaneta Petružalková podšmórny.