„Hdyž chcu ze swojej žonu něšto intimne dožiwić, činimoj to němsce a ženje serbsce“, praji mi jónu bliski, serbšćiny kmany a wo wažnosći konsekwentneho wužiwanja serbšćiny na kóždy pad přeswědčeny přećel. Kak tomu? „Přetož hdyž wuprajiš słowo ‚pjezać‘, to klinči jenož wulgarnje, ale němsce móžeš to na wšelakore wašnje rjec: jara wulgarnje abo intimnje abo lubosćiwje“, mi tehdom wujasni. Za wobkrućenje swojich nowych znajomosćow rěčnych preferencach Serbow nastupajo seks sym so hnydom hišće druheho přećela pisomnje woprašał, kak wón to widźi. „Słowo ‚pjezać‘ prěni raz w žiwjenju pisam a njedopomnju so, hdy sym je posledni raz wužiwał.“