Marek Krawc rozprawja wo aktualnje rozjimanych temach w Čěskej

Praha. Wutoru tydźenja staj čěski mi­nister za kubłanje Robert Plaga a hłowny šulski inspektor w Praze Tomáš Zatloukal wuslědki lońšich Pisa-testow před­stajiłoj. Z nich wuchadźa, zo wjace hač štwórćina 15lětnych porjadnje čitać njemóže.

„Šulerki a šulerjo zasadnje pomałšo čitaja.­ Za dźěło z tekstom dyrbimy 70 procentow wjace časa zaplanować hač před dźesać lětami. Zdobom dyrbimy so wuknjacych we wučbje husćišo prašeć, hač rrozumja, štož čitaja“, rozprawja Michal­ Kaderka, wučer za stawizny a medialne kubłanje, kotryž nawjeduje wu­čersku platformu. Po jeho nazhonjenjach zamóže dźeń a mjenje šulerjow na wobsahi tekstow so koncentrować. Wosebje dołhe teksty jich wužaduja. „A tež słowoskład młodostnych je so spóznajomnje pohóršił“, Kaderka skedźbni.