Pólska awtorka Olga Tokarczuk swoju najnowšu twórbu předstajiła
Wrócław. Wosrjedź oktobra je pólska spisowaćelka Olga Tokarczuk, lawreatka Nobeloweho myta, swój nowy roman „Świata jest za dużo“ (Swěta je přewjele) we Wrócławju předstajiła. Po informacijach pólskeho dźenika Gazeta Wrocławska běše zarjadowanje w hoberskej Wrócławskej Hali lětstotkow dohromady něhdźe 4200 čitarjow přiwabiło. Hižo wjele hodźin do zarjadowanja na nju čakachu, zo bychu sej awtogram tuchwilu najznaćišeje pólskeje spisowaćelki zawěsćili.
Nimale 700 stronow wopřijacy roman powěda biografije najwšelakorišich wosobow, kiž běchu po Druhej swětowej wójnje do Delnjeje Šleskeje přišli a kiž spytaja sej w rozwalinach tamnišich městow a wsow nowe žiwjenje natwarić. Mjez nim su šlescy domoródni; francoscy hórnicy; Židźa, kotřiž běchu holocaust přežiwili abo z wuchodnych kónčin kraja wuhnaći Polacy, kotrež běše Sowjetski Zwjazk po wójnje anektował. Wšitcy zetkawaja so w zničenym Wrócławju resp. w njedalokim měsće Wałbrzychu.
