Nadběhowar sobotu w Krakowje šěsć ludźi zatřělił
Krakow. Zahubna ataka nadběhowarja w Krakowje ze šěsć smjertnymi woporami a 15 zranjenymi wosobami šokuje cyłu Pólsku. Pólski staćan běše minjenu sobotu něhdźe w 15 hodź. w Krakowskej turistiskej štwórći blisko hłowneho torhošća ze swojeho awta won na pasantow třělał. Mjez morjenymi je štyri Polakow, Awstričanka a Wulkobritaničan. Mjez zranjenymi je pjeć turistow z wukraja, mjez druhim tež z Němskeje.
We wobrónjenym rozestajenju zrani Krakowska policija atentatnika chutnje. Dźensa w nocy je wón w chorowni zemrěł. Tež zastojnikaj policije so zraništaj. Jedyn z njeju – Jakub Kuklik – ćežko. Policija je ludnosć namołwjała, zo njech za njeho krej darja. Wón běše so wobrónjenemu atentatnikej „rozsudźeny a bjez kóždeho wahanja napřećo stupił“.
