Awtor dźensa

Kilian Hrjehor

„Wy tu radšo dale njeběžće, wzmiće wokołopuć!“. Hłós muža bě chutny, mjezwočo lózyske. Minjeny pjatk běchmy sej pjeć Sernjančanow a Róžeńčanow do Braunschweiga dojěli, zo bychmy FC Energiju Choćebuz při wonkownej hrě druheje zwjazkoweje ligi podpěrali. Po puću k stadionej chcychmy jeničce křižowanišćo přeprěčić. Tola koparski fan Eintracht Braunschweig nam jasnje wujasni, zo je tutón puć po wšěm zdaću jenož za Braunschweigskich fanow. Wo přećelnym pokiwje tu znajmjeńša pisać njemóžu. Najebać tutoho trochu spodźiwneho zetkanja bě naš stadionowy wopyt měrliwy. Sportowsce drje smy hladajo na wuslědk 0:0 mało swjećili, tola to njebě při kóždej koparskej hrě w Braunschweigu tak. Wosebje hdyž rěka přećiwnik Hannover 96.