Marek Krawc rozprawja wo aktualnje rozjimanych temach w Čěskej
Praha. Tež lětsa bědźachu so naši južni susodźa w lěću z wysokimi temperaturami. Na kóncu junija přesahachu naměrjene hódnoty stare rekordy kaž mjeztym skoro kóžde lěto. To so wězo jara negatiwnje na strowotu ludźi wuskutkowaše. W lětušim lěću, to rěka wot spočatka junija do kónca awgusta, zemrě w Čěskej 26 851 ludźi. Ličba wuchadźa z aktualnych datow Čěskeho statistiskeho zarjada (ČSÚ).
„Ličba hodźi so z tej z lěta 2024 přirunać, jako zličichmy 26 743 zemrětych“, wuzběhny Markéta Šafusová z wotrjada demografiskeje statistiki ČSÚ. 2025 zemrě 520 ludźi mjenje, 2022 pak 593 ludźi wjace hač lětsa. Wosebje lětnje měsacy su po słowach Šafusoveje „kritiske“.





