TYDŹEŃ DOŁHO běchu karpy w Čěskej wulce wažna wěc. W Pasohlávkach, wsy na Morawje ze 750 wobydlerjemi njedaloko Brna, wotměchu so mjenujcy swětowe mišterstwa w jich łójenju, titlowane World Capr Classic 2016. Při bliskej Novomlýnskej zawěrje je so wot 12. do 17. požnjenca w 114 teamach dobrych 500 wudźerjow z cyłeho swěta wubědźowało. Tónkróć njeńdźeše pak wo najwjetše mnóstwo nałójenych karpow. Prawidło rěkaše z třomi popadnymi eksemplarami docpěć najćešu wahu. Tele wašnje polěkowaše napjatosći hač do samoho kónca. Jako dobyćer wuńdźe z profesionelneho wudźenja domjace mustwo. Wot Karela Nikla, Jana Dadáka a Jakuba Kumšty popadnjena trójka karpow wažeše njepřetrjechjomnych 58,6 kilogramow. Najćeši nawudźeny karp bě po čěskich medijach 19,9 kilogramow. Rěčnica championata Tereza Vágnerová praji, zo je zarjadowanje měrnje wotběžało, wobdźělnicy su jeničce z horcotu swoje problemy měli. Wuspěšne čěske mustwo naslěduje němske, kotrež bě sej titl z minjenych swětowych mišterstwow w Francoskej přiwjezło.
Bratislava (SŽ/K). Za nastajenjom ludnosće k Europskej uniji a k NATO je so słowakska zwěsćowarnja zjawneho měnjenja Globsec policy Institute w kraju samym a k tomu w Čěskej republice a w Madźarskej wobhonjała. Wunjesło je to kedźbyhódne wuslědki. Tak ma sobustawstwo w EU za spomóžnu wěc dobrych 50 procentow woprašanych słowakskich kaž tež madźarskich ludźi, mjeztym zo je to w Čěskej jeničce 32 procentow. 24 procentow Čechow ma k EU samo negatiwnu poziciju, w Słowakskej je toho 14 procentow a w Madźarskej jenož wosom. Přichileni su Češa porno tomu NATO, mjenujcy ze 44 procentami. Madźarska wupokazuje samo 47 procentow přihłosowarjow aliancy, w Słowakskej pak jeno 30 procentow.
Nastupajo fakt, zo je Čěska najbóle euroskeptiska z třoch krajow, awtorojo projekta přispomnjeja, zo wjetšina jeje ludnosće prozapadnu orientaciju kraja přiwšěm podpěruje. Woprašowanje zdobom wujewi, zo wjetšina Słowakow a Čechow rólu Zjednoćenych statow Ameriki w Europje negatiwnje hódnoći, w Madźarskej je 39 procentow tohole zmyslenja.
PRAWOSŁAWNI wěriwi čěskich rudnohórskich kónčin njejsu dotal swoju cyrkej měli. Kemši su tohodla do Karlovych Var jězdźić dyrbjeli, hdźež w cyrkwi swjateju Pětra a Pawoła wšak ruscy měšnicy Bože słužby swjeća, k tomu w starosłowjanšćinje. Wot njedawna maja na nje nětko bliže, znajmjeńša přechodnje. W Novych Hamrach su na lěto wotnajeli katolsku cyrkej swj. Jana Nepomuka, kotraž je praktisce njewužiwana, njedostatka katolskich wěriwych dla. „W njej smy wob lěto w najlěpšim padźe dwójce Božu słužbu swjećili, jedne z wěstosću – z putnikowanjom k swjatemu Janej Nepomukej“, wuswětla dekan romsko-katolskeje parochije Jan Pražan. Jěrje wšak duchowny přispomnja, zo wobydlerjo wo katolske prědowanje njerodźa. W Novych Hamrach wotměwaja so prawosławne Bože słužby w čěšćinje jónu měsačnje a na wšěch prawosławnych swjatych dnjach. Prawosławni wěriwi tejele kónčiny nawjazuja tak na tradiciju, kotruž bě po Druhej swětowej wójnje w regionje tudyši wučer-dowěrnik Simeon załožił.
Praha (ČŽ/K). Lětuše žně žita kaž tež rěpika su w susodnym kraju praktisce dokónčene, kaž powěsćernja ČTK zdźěla, powołujo so na informaciju rěčnicy ministerstwa za ratarstwo Markéty Ježkoveje. Z wunoškom su ratarjo spokojom, je dźě znowa trochu wyši hač loni. Tak su lětsa 7,95 milionow tonow žita a 1,4 miliony tonow rěpika nažnjeli. Loni bě to 7,9 milionow tonow žita a 1,19 milionow tonow rěpika. Přerězny wunošk na hektar wučinja 6,30 tonow porno 6,07 tonam loni a pola rěpika 3,57 tonow k 3,53 tonam.
W minjenym poł lětdźesatku su burja kraja wunošk žita spochi stopnjować zamóhli. Mjenje spokojom wšak su lětsa z kwalitu zorna. Přisłušne analyzy ratarskich ekspertow wupokazuja, zo su zornjatka často mjeńše hač normalnje. „Nimo toho nachadźa so w probach poměrnje často fuzariozne zorno“, ministerstwo za ratarstwo přispomnja. Hdyž hribik „fuzarium“ kłosy nadpadnje, ma to snadniši wunoški za sćěh. K tomu ćerpi z toho pjekarska kwalita zorna a nic naposledk schadźiwosć (Keimfähigkeit) symjenja.
Wrócław (dpa/SN). Napjatosć a wočakowanja běchu wulke, jako započachu před dwěmaj tydźenjomaj bagry blisko delnjošleskeho Wałbrzycha za tak mjenowanym nacijowym ćahom pytać. Tón, tak znajmjeńša tukachu, dyrbješe w podzemskim tunlu schowany być. Bagry dźěłachu so šěsć metrow hłuboko do zemje, hač na hromady pódy pak ničo njenańdźechu. „Skrótka prajene: Na tymle městnje, na kolijowym kilometrje 65 njeje žadyn tunl a njeje tež žadyn ćah“, zdźěli rěčnik hobbyjowych pytarjow za pokładom Andrzej Gaik, po tym zo běchu dźěry zaso zamjetali. „To pak njerěka, zo ćah njeeksistuje. Njepopušćimy.“