To a tamne (05.07.18)
Zabłudźeneho hołbja ze spanskeje stwy wuswobodźili su policisća w Budyšinje. Ptačk bě přez wočinjene wokno do rumnosće přilećał a njeměješe wočiwidnje wotpohlad, ju zaso wopušćić. Wobydlerka wołaše tuž policiju wo pomoc. Wobsadka policajskeho awta hołbja na to popadny. Při tym so tón ani njewobaraše, kaž w policajskej rozprawje steji.
Dudlowarjo ze wšeho swěta poćahnu kónc tydźenja po Berlinje. Towarstwo přećelow dudlawy přeproša wot jutřišeho hač do njedźele na 39. mjezynarodny swjedźeń na Breitscheidowym naměsće. Organizatorojo wočakuja 180 wobdźělnikow z dwanaće krajow. Dudlowarjo ze Skandinawiskeje budu runje tak pódla kaž z Mexika. Sobotu připołdnju poćahnu woni po Kurfüstendammje.
To a tamne (04.07.18)
Njewočakowanu psyču pomoc dósta Lipšćanska policija z Bremena. Na wučušlenje drogow trenowany pos Crawford, kotryž bě zhromadnje ze swojej wobsedźerku w Sakskej na dowolu, je w jednym z Lipšćanskich parkow marihuanu namakał. Wobsedźerka Crawforda je runja swojemu psej w słužbje Bremenskeje policije. Wobaj so po parku při Hłownym dwórnišću wuchodźowaštej, hdźež pos cigaretowu tyzku z drogami wučucha. Namakanku policija sobu wza.
Wjace hač 1 000 listow z pjenjezami a dobropisami a něhdźe 150 pakćikow je listonošerka w hessenskim Bad Hersfeldźe překřiwiła, načiniwši tak 15 000 eurow škody. 33lětnu padušnicu zwěsćichu, po tym zo běchu so ludźo hóršili, zo wočakowana póšta njedochadźa. Nimo toho bě žona kradnjene handyje a laptopy stajnje w samsnym wobchodźe předawała.
To a tamne (03.07.18)
Awto z rěki wućahnyć je wohnjowa wobora w Lipsku dyrbjała. 22lětny muž bě wóz na brjohu Běłeho Halštrowa wotstajił, bjez toho zo by ručne borzdźidło přićahnył. Awto jědźeše na to runu smuhu do wody. Hač hodźi so wone nětko hišće wužiwać, nichtó njewě.
Swoju maturitnu klawsuru wospjetować dyrbješe 33 francoskich šulerjow, dokelž bě něchtó jich pruwowanske podłožki pokradnył. Před dobrym tydźenjom pisane klawsury buchu z awta pruwowarja spakosćene, zdźěli rěčnik zamołwiteho šulskeho zarjada w Orléansu. Abiturienća dyrbjachu tuž pruwowanje w socialnych a hospodarskich wědomosćach znowa pisać. W Francoskej maja centralnu maturu, a tohodla dóstawaja wšitcy šulerjo samsne pruwowanske nadawki. Policija přeco hišće za kradnjenymi klawsurami pyta.
To a tamne (02.07.18)
Do jastwa póńdu třo młodostni, kotřiž běchu loni w juhočěskim měsće Třinec-Guty starožitnu drjewjanu cyrkwičku zapalili. Po wusudźe Ostravskeho wobwodneho sudnistwa změja woni třiapoł, wosom a dźewjeć lět wotsedźeć. Najwyšu pokutu dósta naškarak zapalerstwa. Woheń načini škodu 20 milionow krónow. Historiska škoda njeje ani wobličomna. Prašani za motiwom njeskutka su wobskorženi zwjetša z ramjenjemi sukali.
Sto porow sněhakow su njeznaći z wupožčowarnje w badensko-württembergskim Blausteinje pokradnyli. Nimo toho wzachu tež hišće třiceći porow sněhakowarskich čriji a dalše wuhotowanje sobu. Policija trochuje škodu na 50 000 eurow. Dokelž porjedźernju w lěću lědma wužiwaja, njemóža ani rjec, hdy su paduši tam pobyli. Wobsedźer bě to hakle kónc tydźenja zwěsćił.
To a tamne (29.06.18)
Krokodil w spušćadle je wulki njeměr w bayerskim Eglfingu zbudźił. Rozpjeršeny muž zazwoni policiju a rozprawješe jej, zo bě hłowu krokodila we wodźe wuhladał. Wobsadka policajskeho awta móžeše kurioznu namakanku najprjedy raz wobkrućić. Kaž pak so spěšnje wukopa, jednaše so jenož wo atrapu, kotraž so woprawdźitemu krokodilej jara podoba. Při žerdźi přiwjazana wupadaše wona kaž woprawdźity reptil.
Dokelž njebě tři eura za zhromadnu wječer na kóncu šulskeho lěta zapłaćiła, njeje powołanska šulerka w sewjeroněmskim Emdenje najprjedy raz swoje wuswědčenje dóstała. 17lětna pak njebě na jědźi ani wobdźělena. Najebać to chcyše jej wučerka dokument hakle přepodać, hdyž su tři eura zapłaćene. Nawodnica šule njeměješe za to žane zrozumjenje a šulerce wuswědčenje da.
To a tamne (28.06.18)
Sydła z parkowaneho awta pokradnyli su njeznaći w Zwickauskej bydlenskej štwórći. Woni běchu so na dotal njeznate wašnje do zamknjeneho awta zadobyli. Tam wutwarichu sydło šofera, sobujěduceho kaž tež zadnju ławku a so zminychu. Policija pyta nětko swědkow, kotřiž su kuriozne padustwo wobkedźbowali abo wědźa, hdźe su sydła wostali.
Wosrjedź operacije mozow na prěčnej fleće hrała je pacientka w awstriskim Grazu. Rusowka Zofija Pinajewa hudźeše kruchi Mozarta, Bacha a Prokofjewa, jako jej lěkarjo tumor z mozow wotstronichu. Za nich bě mały koncert premjera. OP z wotućenym pacientom je jenička móžnosć, telko tumora kaž móžno wotstronić a při tym wobkedźbować, hač su wšitke mozowe funkcije pacienta w porjadku. Fletistka wšak njebě ze sobu cyle spokojom, dokelž bě so jónu zahrała.
To a tamne (27.06.18)
Do mobilneje toalety ze swojim awtom zrazył je šofer w Bochumje. 37lětny muž runje mobilnu budku z karu transportowaše, jako šofer na parkowanišću wróćo storkaše. Při tym wón transport přewidźa a zjědźe do budki. Ta so zwróći a padny na 37lětneho. Wodźer awta muža wuswobodźi, kiž so snadnje zrani. Awto bě lochko wobškodźene, toaleta wosta cyła.
Njeprošeny zwěrjeći hósć je koparsku hru w Awstralskej mylił. Wosrjedź partije žónskeje regionalneje ligi w stolicy Canberra skoči kenguru na hrajnišćo. Wón inspicěrowaše trawnik, wobčucha bul a wosta při wrotach sedźo, kaž internetny widejo pokazuje. Hakle po tym zo bě trenar jednoho z mustwow zwěrjo z kopanišća wuhnał, móžachu z hru pokročować. Awstralska ma wjace hač 45 milionow kenguruwow, nimale dwójce telko kaž wobydlerjow.
To a tamne (26.06.18)
Blidotenisowy rekord nastajiło je wjace hač tysac šulerjow w Düsseldorfje. Dokładnje 1 252 dźěći a młodostnych z 25 šulow a institucijow je so w Düsseldorfskim koparskim stadionje zešło, zo bychu blidotenis hrali. Dotalny rekord 508 wobdźělnikow z lěta 2017 su tak wjac hač podwojili. Pomocnicy běchu 102 tenisowej blidźe nastajili, zo móhli wobdźělnicy „kołoběh“ hrać. Při tym wjacori blidotenisća za samsnym blidom hraja, běhajo wot jedneje strony na druhu.
Mortweho delfina wosrjedź lěsa namakała je ruska turistka njedaloko čornomórskeho Sočija. Žona hnydom zamołwitych informowaše, po tym zo bě so njedaloko awtodróhi wuchodźowała. Dotal njemóža sej rozkłasć, kak je dwaj metraj dołhe zwěrjo do lěsa přišło. Móžno, zo běchu delfina ilegalnje w zwěrjencu dźerželi, zo je na transporće zahinył a zo su jeho na to w lěsu wotbyli.
To a tamne (25.06.18)
Titul „najwohidniši pos“ nosy wotnětka jendźelska buldoga „Zsa Zsa“. Dźewjeć lět stare zwěrjo je wubědźowanje „World’s Ugliest Dog“ w kaliforniskim Petaluma dobyło, kaž sćelak ABC7 zdźěli. Wobsedźerka Megan Brainard dósta myto 1 500 dolarow. Cyłkownje 15 psow bě za lětuše wubědźowanje, kotrež mjeztym nimale 30 lět přewjeduja, přizjewjenych. Tam njehódnoća jenož wonkownosće, ale tež charakter štyrinohačow.
Wulka myš je w Indiskej papjerjane pjenjezy w hódnoće 15 000 eurow zežrała, a to w pjenježnym awtomaće. Jako nastroj wjace njefungowaše, jón sobudźěłaćerjo banki wočinichu a namakachu w nim mortwu myš, wobdatu wot lutych roztorhanych pjenjez. Prawdźepodobnje bě so wona přez dźěrku za kable do awtomata zadobyła.
To a tamne (22.06.18)
Pokradnjeny hoberski awtokran su nětko w Egyptowskej wuhladali. 55 km/h spěšne jězdźidło bě so před tydźenjemi w Stuttgarće bjez kóždeho slěda zhubiło, štož mjez ludźimi wulke zadźiwanje zbudźi. Swědk je 48 tonow ćežki a 200 000 eurow drohi kran w přistawje Alexandrije wuhladał. Prawdźepodobnje běchu paduši kran z łódźu do Egyptowskeje dowjezli.
Płuwajo před policiju ćěkał je 48lětny w bayerskim Pettstadće. Do toho bě wobchadne njezbožo zawinił a ćeknył. Jako zastojnicy dojědźechu, skoči wón do rěki. Policist wědźeše sej pomhać, požči sej koleso pěška a muža na brjoze „přewodźeše“, doniž so tón po dobrym kilometru njepoda. Pola njeho zwěsćichu 1,5 promilow alkohola.
