Wo serbskich stawiznach města, hdźež schadźuje so jutře hłowna zhromadźizna třěšneho zwjazka
Wojerecy běchu a su po Budyšinje a Choćebuzu sobu najwažniše město w serbskich stawiznach. Před tydźenjomaj předstajichmy w Předźenaku „Swědki serbskeho žiwjenja w starych Wojerecach“ a přeprosychmy na wuchodźowanje k nim. Jutře schadźuja so delegaća towarstwow a župow na hłownej zhromadźiznje Domowiny we Wojerecach.
Stawizny bywšeho wokrjesneho města nad Čornym Halštrowom na sewjeru Hornjeje Łužicy su wusko zwjazane ze zańdźenosću serbskeho ludu. Wojerecy buchu 1268 pod němskim mjenom Hoyerswerde prěni króć naspomnjene. Němske mjeno skedźbnja na połoženje sydlišća wěsteho Hojera na kupje wosrjedź bahna, kotruž mjenowachu tehdy němsce „werda“. Podobne pomjenowanja nadeńdźemy pola Biskopic – Bischofswerda, Hagenwerda a Werder nad Habolu pola Podstupima. Wojerecy wostachu lětstotki městačko w Budyskim kraju.
