smažnik Fanojo wulkeje kopańcy smědźa so zaso wjeselić, wšako započnu so 14. junija swětowe koparske mišterstwa. Naši hólcy wokoło Jogija Löwa chcedźa wězo wšitko za to činić, zo bychu swój před štyrjomi lětami dobyty titul swětoweho mištra zakitowali. Byrnjež žadyn serbski kopar w kadrje njebył, budu swětowe mišterstwa tež za serbskich sportowych funkcionarow zajimawe. Woni chcedźa mjenujcy rešeršować, z kelko pjenjezami je so Rusam poradźiło turněr do swojeho kraja dóstać. Tele dopóznaća maja tomu słužić, přichodnu europeadu zaso we Łužicy přewjesć móc.
róžownik Dokelž spominamy 5. meje na 200. narodniny Karla Marxa, chce Zwjazk serbskich rjemjeslnikow a předewzaćelow zjawnu konferencu přewjesć. Hłowna tema budźe, kak móhli firmownicy teoretiske dopóznaća Marxa wo kapitalu hišće lěpje za sebje zwužitkować a ze swojich předewzaćow hišće wjace wuzbytko­wać. Tónle zaměr kapitala drje bě Marx stajnje kritizował. Serbscy rjemjeslnicy pak su so zawjazali swoje přidatne dochody tak zasadźeć, zo bychu wšitcy něšto z toho měli.