Foće: Dominik SuchyWot 14. do 18. januara podachu so šulerjo 8. lětnika SWŠ Ralbicy pod nawodom knjeza Bejmaka a knjeza Wornarja do sněhakowanskeho lěhwa w čěskim Bedřichovje, štož je hižo z tradiciju. Wuměnjenja běchu wulkotne. Witachu nas mjenujcy 70 do 80 centimetrow sněha a prima spřihotowane čary w lěsach Jizerskich horin kaž tež na skłoninach za alpinske sněhakowanje. Jenož jara mało z nas šulerjow je hižo jónu na běžkach abo specielnych sněhakach za wotjězd stało. Tak dyrbjachmy so najprjedy na njezwučene pohibowanje zwučić. Po prěnich njewěstych krokach so počasu na sněhakowanje zwučichmy. A hdyž něchtó z nas padny, je mjechko do sněha padnył. Mariusej pak so při tym kij złama. Ale wón měješe wulkotnu ideju, wobstara sej w lěsu nowy. Tež přez lód złamane štomy njeběchu zadźěwk za nas. Dokelž běchmy na prěnimaj dnjomaj na běžkach wažne znajomosće sněhakowanja nawuknyli, smalachmy srjedu hižo wěsće z alpin­skimi sněhakami horu dele. To bě ći wjeselo. Wuspytachmy so w formaciskim jězdźenju a na kóncu samo we wubědźowanju super-G.