„Znowazjednoćenje Němskeje – són a woprawdźitosć“ rěka kapsna kniha z pjera Waltera Leonharda. Rodźeny Durinčan je 40 lět we Wětrowskej šamotowni dźěłał. Serbske Nowiny wozjewjeja jeho trochu wudospołnjene, wot Arnda Zoby a Friedharta Krawca z přećelnej dowolnosću nakładnistwa DeBehr zeserbšćene dopomnjenki.
W lěće 1970 běštaj so kancler zwjazkoweje republiki Willy Brandt a ministerski prezident NDR Willi Stoph w Erfurće a Kasselu zetkałoj. W Erfurće nawali so žołma počesćowanja, hódnoćenja a nadźije ludźi w tajkej měrje na Brandta, kajkuž bě samo w zapadnej Němskej zrědka dožiwił a štož jeho wosobinsce njewěsteho činješe. Zetkanje w Erfurće znazornješe wočakowanja na praktikabelne polěpšenja w němsko-němskich poćahach. W Kasselu pak bě jara problematiske zaručić wěstotu wobeju delegacijow.