Lodowi piraća Crimmitschau –
Łužiske liški Běła Woda 3:2
(2:0, 1:2, 0:0)
Tež w zapadosakskim Crimmitschauwje su Běłowodźanscy lodohokejisća ze swojej negatiwnej seriju pokročowali a štwórty raz za sobu přěhrali. Sprěnja bě ofensiwa přesłaba. Třělwy na wrota a šansy njewotpowědowachu a njewotpowěduja tuchwilu kwaliće druheje zwjazkoweje ligi. Tež w powerplayju klaca. Su-li Łužiske liški raz z mužom wjac na hrajnišću, pobrachuja jim ideje, druhdy wězo tež zbožo. Wulki brach su přihrawki, kotrež su wažne za spěšnu ofensiwnu hru. Wone pak su přehusto přešpatne, runje tak kaž diagonalne přihrawki. Te kontrahenća zdźěla jara lochce wotpopadnu, a tak je stajnje chětro wobćežne sej puk zaso do swójskich rjadow wróćo zdobyć.
Furioznje běchu domjacy partiju započeli. W 4. a 7. min. móžachu woni wyskać, štož za Liški rěkaše spytać zastatk wurunać. To pak so jim w prěnjej třećinje wjac njeporadźi, a to tež horjeka mjenowanych přičin dla.