Pohladnicy powědaja wo dawnych časach, swědča wo podawkach a ludźoch. Alfons Handrik wotkrywa nam swět, na kotryž smy minjene lěta nimale pozabyli.

Pohladnica wo Komorowje pola Rakec je z časa njeposrědnje do Druheje swětoweje wójny. Wona skedźbnja ze štyrjomi motiwami na čas před nimale sto lětami. Prěni raz bu Komorow 1374 pisomnje naspomnjeny. W běhu lětstotkow je wjes swoju přisłušnosć wjacore razy změniła. W 16. lětstotku bě Njeswačidłu přirjadowana a po sto lětach potom Rakecam. Po Wienskim kongresu 1815 bu prusko-sakska hranica połdra kilometra sewjernje wsy před Rach­lowom zapołožena. Tehdyša hranica je tež dźensniša mjeza mjez gmejnu Rakecami a městom Kulowom. Hač do 1957 bě Komorow z Trupinom samostatna gmejna a bu po tym do Rakec zagmejnowany. Za swoju statistiku wo serbskej ludnosći je Arnošt Muka we wosomdźesatych lětach 19. lětstotka zwěsćił, zo njebě mjez 338 wobydlerjemi žadyn Němc. 1923 bu tam tež wotnožka Serbskeho Sokoła załožena. Hišće 1956 zwěsći Arnošt Černik 67 procentow serbskorěčneho podźěla. Zwostali su dźensa nic ani hišće dwacećo.