Spodźiwne zwuki klinča ze šmóratka, sy-li z Tobiasom Čižikom po puću. Štóž je w socialnych syćach přizjewjeny, je znaje. Kóždy hinak klinči, hač Facebook, Instagram, TikTok abo whatsapp – brr, bzzz, biiip abo klingo. Na kóždy pad je to znamjo, zo něchtó druhi na swěće něšto wozjewi. Tobias Čižik so tomu njewobara, wšako je sam w socialnych medijach prezentny. Wosobinsce drje mało, tola za swoje předewzaće – Kulturny centrum Krabatowy młyn Čorny Chołmc. Milenka Rječcyna je so z jednaćelom zarjadnišća rozmołwjała.
Kotru hódnotu přicpěwaće tutomu wobłukej nowych medijow?
T. Čižik: Mam kanale za dobru šansu, na jednore wašnje mnohich ludźi docpěwać. Zdobom budźiš ze swojimi posyłkami zajim cilowych skupin, kotrež chceš chětř narěčeć. Za to njeje trjeba wjele přihota. Posłužujemy zajimcow na Facebooku, Instagramje a na našej internetnej stronje .
To pak dawno wšitke kanale njejsu, kotrež dźensa k dispoziciji steja. Wobmjezujeće so z wotpohladom?
