Inženjer Bernd Mertingk wopytowarjow hižo dźesać lět po swětowym herbstwje Mužakowski park wodźi
Bernd Mertingk z Běłeje Wody hižo dlěje hač dźesać lět wopytowarjow po parku přewodźa. Druhdy samo 35 króć wob lěto.Něhdźe 800 lět su někotre z dubow stare. „To su najstarše štomy parka. Nadeńdźeće je wosebje na pólskim boku“, powěda Bernd Mertingk z Běłeje Wody. W parku hrabje Pücklera zhladuje 73lětny rodźeny Zhorjelčan rady z Pückleroweho kamjenja do směra noweho hroda. Z dwójneho mosta sej pohlad na knježu horu lubić da. A z ruiny cyrkwje na horje w Mužakowje pućuje wid na pólski bok. „To su najrjeńše wóski, po kotrychž móžeš sej park wobhladać. Hrabi Pücklerej běchu jónkrótne perspektiwy krajiny přewšo wažne“, měni něhdyši inženjer za wódne hospodarstwo. Dźensa je wón wuměnkar a hižo dźesać lět dołho wón za załožbu „Park hrabje Pücklera Mužakow“ wopytowarjow z cyłeho swěta po parku přewodźuje. Wob lěto čini tole hač do 35 razow. Wot lěta 2004 je park wobstatk swětoweho herbstwa UNESCO.
