Domowina a jeje župy
Hižo na załoženskej zhromadźiznje zwjazka serbskich towarstwow 13. winowca 1912 we Wojerecach su rozsudźili: „Zwjazk dóstanje mjeno ‚Domowina‘ a budźe dźěleny do štyrjoch podzwjazkow: 1. sakski katolsko-serbski, 2. sakski ewangelsko-serbski, 3. prusko-hornjołužiski a 4. pruski-delnjołužiski.“ (z rozprawy měsačnika „Łužica“).
Regionalne rozrjadowanje Domowiny pak dliješe so předewšěm wójny dla. Hakle na delegatnej zhromadźiznje 24. pražnika 1921 w Radnej pincy we Wojerecach su „wutworjenje 4 podzwjazkow wobzamknyli. Porno wotpohladej při załoženju Domowiny pak delegaća měnjachu, „zo so w Sakskej njesmě po konfesiji dźělić, ale jenož po krajinach. Tak budźe sydło w Budyšinje, w Khrósćicach, we Wojerecach a w Khoćebuzu.“ – to pisachu Serbske Nowiny (SN) dnja 25.07.1921.
