Štóž je na awtodróze po puću do Južneho Tirola, měł na kóždy pad w klóštrje Neustift w Vahrnje pola Brixena pozastać a přestawku zapołožić. Klóšter je hižo nimale 900 lět wažny kulturny centrum Južneho Tirola, hdźež móža sej wopytowarjo bohate stawizny kónčiny wotkryć a spřistupnić.

W klóštrje Neustift čiłe žiwjenje knježi. Štóž so ze sewjera abo wuchoda přichadźejo něhdyšemu biskopskemu městu Brixen bliži, tomu napadnu na kóždy pad wšelakore wulke twarjenja, kotrež hromadźe wobšěrny kompleks klóštra Neustift tworja. Do klóšterskeho skutka wosrjedź najsewjernišich winicow Južneho Tirola słušeja wjacore zawody, kotrež so hospodarsce dospołnje sami noša.

Ležownosćow klóštra we wysokosći mjez 600 a 900 metrami, čerstweje klimy a mineraliskeje pódy dla plahuja so předewšěm typiske běłe wina. Čerwjene ­winowe družiny rostu w Eppanje, hdźež klóšter tohorunja ležownosće wob­hospodarja. Kubło z winami słuša do jednoho z najbóle renoměrowanych w dole Eisacktal.