K 80. posmjertnym narodninam basnika a spisowaćela Bena Budarja

Beno Budar

SÓN NA LIPOWY ŠTOM

Na mnohich hałzach piły du,

cyle ćicho, cyle mjelčo,

jedyn druhom hałzy rěza,

z kotrychž něhdy rosćechu

dźěd a wowka, štom bě chěža.

Ričerače, fičefače, daledaće

našej rěče wotrězaće,

dušemrěće, zawidźenje,

nasosraće jěrowate,

bladybaće njepopřate...

Ow mój Božo, wodaj jim!

To so kóčce, lěpje dźe 

w starej bróžni na hunje.

Na korjenjach hrymzaja

knoty, waki, šnaki,

šwincy, liški, fenki,

rozdźěłaja korjenje

na něme małe žiwjenki ...

A tola mała nadźija,

lědma štó ju widźi:

Ze škałby skały lipa kuka,

do kamjenja korjeń suka,

korjeń ze stareho štoma.

Hač jej hałzy narostu?

(LND 1996, SP, str. 37, B. Budar 3)

Škoda, zo wón hižo mjez nami njeje. Kelko rjanych a lóštnych, ale tež kritiskich basnjow a dalšich literarnych twórbow na polu prozy drje by nam hišće darił. Nad nimi by so čitarstwo składnostnje jeho 80. narodnin wjeseliło, kotrež by wón lětsa 19. měrca docpěł. Tola 8. oktobra 2023 bě basnik, spisowaćel a lawreat Myta Ćišinskeho Beno Budar zemrěł.