Runje je młoda Berlinska Serbowka Franka Pollexec třeći semester swojeho studija filmowych wědomosćow na Swobodnej uniwersiće w Berlinje zakónčiła. „W studiju zaběramy so jara teoretisce z filmom a dalšimi medijemi. Sym so tuž bórze samostatnje za móžnosćemi rozhladowała, w kotrychž móhła praktiske nazhonjenja na filmiskim polu zběrać“, wona praji.
Kaž to připad chcyše, wuhlada mać Franki loni spočatk lěta artikl w Serbskich Nowinach, w kotrymž přeprošowaše Marketingowa towaršnosć Hornja Łužica-Delnja Šleska (MGO) předewšěm młodostnych na pjećdnjowski filmowy camp do Budyšina. Wobdźělnicy běchu přeprošeni, pod fachowym nawodom a z profesionelnej techniku w małych skupinach krótkofilmy wo temje „Łužica – žiwa krajina w změnje“ stworić. Za to wopytachu w běhu tydźenja wšelake łužiske kónčiny, kiž su wot změny struktury potrjechene, a nahromadźichu sej tam swoje filmiske motiwy.
