Klarinetowe kwintety słušeja ke kompozicijam, kotrež so w komornohudźbnej literaturje skerje zrědka jewja. Byrnjež wjacori mištrojo klasiki a romantiki někotružkuli mištersku twórbu za tajkule wobsadku spisali – často wěnowanu wirtuozej na solowym instrumenće –, zwosta forma, hinak hač na přikład kruchi za štyrjoch smyčkarjow a klawěr resp. křidło, takrjec nakromny fenomen. Ju trochu ze „žiworjenja w ćěmnosći“ wuswobodźić bě přewšo nadarjenemu klarinetistej Danielej Royjej z pohonom, hudźbytwórcow za nju zahorić a – nic naposledk za njeho – wotpowědne partitury zdźěłać. Dźěl z nich je zhromadnje z cyłkom Collegium Mathis Rochat nahrawał. Wuslědk je loni z podpěru Za­łožby za serbski lud w nakładnistwje ­Edition Roy na CD wušła zběrka twórbow načasnych serbskich komponistow, kotraž móhła samo recipientow přeswědčić, kotřiž so poprawom za stilistisce cyle hinaše zynki zajimuja.