Stronje pominał wadźeńcu skónčić
Dietmar Woidke: Trjebamy tule reformu
Podstupim/Choćebuz (SN/JaW). Braniborske gmejny maja nětko tola wjace chwile stejišćo k planowanej wokrjesnej reformje w kraju zapodać. Tak njetrjebaja so hižo hač do februara wuprajić, ale maja stejišćo hač do srjedź měrca zapodać, rěka w zdźělence knježerstwoweho rěčnika. Na podlěšenje stej so koaliciski wuběrk SPD a Lěwicy dopjednałoj, z čimž sćěhuje próstwu komunow. Zdobom dojedna so na to, reformu a znowarozdźělenje nadawkow gmejnow, wokrjesow a kraja we wobzamknjenju definować. W meji ma so potom wo nim rozsudźić.
To a tamne (05.01.17)
Přibrjóh, posypany z plastikowymi jejami, bě překwapjenka dźěćom a staršim na wuchodofriziskej kupje Langeoog. Tam zběrachu domoródni a turisća wčera kilometry daloko město mušlow překwapjenske jejka, pjelnjene z hrajkami. „Jutry na Langeoog“ wobradźił je po wšěm zdaću hodowny wichor, kotryž bě někotre kontejnery tworow z łódźe sunył. „Cyle wěste pak tole hišće njeje“, kaž policija zdźěla. Pad nětko dokładnje přepytuja.
Kožany konopej wosrjedź puća je wutoru blisko Geeste w Emslandźe njezbožo zawiniło. 54lětna šoferka awta bě jón přewidźała a do njeho zrazyła. Na zbožo so jej ničo njesta. Awto je přiwšěm skóncowane. Kak bě so konopej na dróhu dóstał a hač je jón něchtó při transporće zhubił, dotal nichtó njewě. Tón, komuž słuša, njech to policiji přizjewi.
Kanclerka ministra podpěruje
Berlin (dpa/SN). Zwjazkowa kanclerka Angela Merkel (CDU) podpěruje předstawy nutřkowneho ministra Thomasa de Maizièra (CDU), wěstotny aparat w Němskej přetworić. „Kanclerka bě informowana a je jeho k tomu pohnuła“, zdźěli zastupowacy rěčnik zwjazkoweho knježerstwa Georg Streiter dźensa w Berlinje. Merkel ma namjety de Maizièra za wažny přinošk w tuchwilnej wěstotnej situaciji.
CSU w klawsurje
Seeon (dpa/SN). Něhdźe wosom měsacow do lětušich wólbow zwjazkoweho sejma je strona CSU wot dźensnišeho w klawsurje. Předewšěm wo wěstoće chcedźa tam wuradźować, zdźěli šefowka bayerskeje krajneje skupiny Gerda Hasselfeldt. Jako hosći třidnjowskeje klawsury wočakuja w klóštrje Seeon mjez druhim norwegsku ministersku prezidentku Ernu Solberg, komisara Europskeje unije Juliana Kinga, nutřkowneho ministra Bayerskeje Joachima Herrmanna, ale tež šefa CSU Horsta Seehofera.
Optimizm w twarskej branši
Nižina „Axel“ wupřestrěwaše swoje wichory minjenu nóc po ...
Stanisław Tilich: Pjenjezy same wšo njerozrisaja
Drježdźany (dpa/K/SN). Sakski ministerski prezident Stanisław Tilich (CDU) pomina k tomu, zo matej wuchod a zapad hromadźe dźeržeć. Su-li rozdźělne wuměnjenja, je hromadźe dźeržeć ćešo“, rjekny wón powěsćerni dpa. „Po mojim zdaću mamy situaciju, w kotrejž mnozy mysla, zo so wšitko wot samo sporjadkuje. Z pjenjezami samymi pak so wšo rozrisać njeda. Mjez wuchodom a zapadom je přeco hišće wulkich rozdźělow, štož pak so hižo na wědomje njebjerje. Mnozy sej mysla, trojotrasowa awtodróha problem wotstroni. Tomu tak njeje. Wuwědomić sej tež dyrbimy, z čimž hišće klaca. Nastupajo přiběracy populizm sakski krajny šef CDU na to pokaza, zo wobsteji deficit mjez lubjenjom a spjelnjenjom. Ludźom dźe wo to, zo prawo knježi, hewak nastawa frust. Mnozy nimaja hižo žanu stronu za kmanu problemy rozrisać. „Politika dyrbi sej zaso dowěru zdobyć“, Tilich naležnje podšmórny, „tež w prašenju přichodnych systemow za zawěsćenje staroby. Kóždy rěči wo demografiskim wuwiću. Kóždy wě, zo ludźo dale bóle starnu. A kóždy zdobom wě, zo je spochi mjenje młodych płaćerjow přinoškow.
Zaso połnje dźěłać směć
Dźěłopřijimarjo maja prawo na wobmjezowane dźělne dźěło dóstać
Budyšin/Berlin (SN/at). Přičin je dosć, zo by za jednotliwca/jednotliwču lěpje było wěsty čas přikrótšene dźěłać. Njejapki chorobny abo hladanski pad abo małe dźěći w swójbje su přikłady, za kotrež je po płaćiwych zakonjach w Němskej móžno dźělnje dźěłać. Zakoń wo dźělnym dźěle a wobmjezowanju (TzBfG) tole rjaduje. Žadyn poskitk nimaja dotal wšitcy ći, kotřiž chcedźa jenož wěsty čas mjenje dźěłać. Na tutu prawnisku dźěru měri so zakonska iniciatiwa zwjazkoweje ministerki za dźěło Andreje Nahles (SPD), wo kotrejž rozprawja powěsćernja dpa.
Tak měli dźěłopřijimarjo w Němskej přichodnje prawo dóstać, swój dźěłowy čas časowje wobmjezować směć a so po tym zaso k połnej ličbje hodźin wróćić. Po płaćiwym zakonju je jenož narok na časowje njewobmjezowane dźělne dźěło zaručene. Zo chcetej prawo nawróta w lětsa nachilacej so legislaturnej periodźe rjadować, stej unija a SPD do koaliciskeho zrěčenja zapisałoj.
Z nowej rubriku do noweho lěta
Karikaturu pod hesłom „Nowe lěto w zarjedźe Domowiny“ je za Serbske Nowiny Lucretia Brězanec z delnich Sulšec narysowała. Šulerka Serbskeho gymnazija Budyšin je jedna z wuspěšnych wobdźělnikow wubědźowanja „Krabat 2.0“ młodźinskeho wotrjada Domowiny. Tam doby wona mjez druhim nadawk, za SN karikaturu zhotowić. Po prěnjej rozmołwje z dobyćerku a dźensnišim zazběhu rubriki smědźa so čitarjo našeho wječornika na pokročowanje wjeselić. SN
Rysowanka: Lucretia Brězanec
To a tamne (04.01.17)
Chětro wulka ryba je wudźerja před awstralskim přibrjohom Exmouth do wody sćahnyła. Hakle po pjeć hodźinach móžachu Nowoseelandźana z lódzymneje wody wućahnyć, kaž rěčnik wuchowanskeje słužby zdźěli. Dźakować ma so muž rybarjam, kotřiž běchu so z nim podarmo skontaktować spytali. Jako so wón po třoch hodźinach přeco hišće njepřizjewi a jedyn kolega prózdny čołm nańdźe, zawołachu wuchowansku słužbu.
Pjeć kilometrow dołhu razantnu jězbu na třěše swojeho pokradnjeneho awta je Osama Aoukili w francoskim Lyonje přetrał. Dźeržo so z jednej ruku při nošaku za wačoki je wón z tamnej ruku čisło policije na swojim handyju wolił. W bydlenskej štwórći, hdźež dyrbješe awto pomałšo jěć, Aoukili z njeho skoči. Paduch spyta na to ćeknyć. Policija pak jeho zadźerža a zaja.
Němcy w Danskej chcedźa do regionalneje rady
Němska mjeńšina w Danskej móžeše lěta 2013 kedźbyhódny wólbny wuslědk wuwojować: Při komunalnych wólbach w štyrjoch sewjeroschleswigskich (južnodanskich) gmejnach móžeše politiska strona němskeje mjeńšiny, Schleswigska strona (SP), swój podźěl wo 63 procetnow rozšěrić a cyłkownje 8 620 hłosow zdobyć. To dosahaše, zo móžeše z dźewjeć zapósłancami město dotal pjeć do štyrjoch měšćanskich zhromadźiznow w Tondernje, Haderslebenje, Apenradźe a Sonderburgu zaćahnyć.
Lětsa su přichodne komunalne wólby. Schleswigska strona chce spytać swoje pozicije w komunach zakitować a – z něšto zbožom – samo skrućić. Nimo toho poda so na nowu politisku runinu: Wona chcyła tež w južnodanskej regionalnej radźe zastupjena być, hdźež předewšěm wo chorownjach a hospodarskej politice rozsudźeja.
