Zjězd Christival z piknikom

wutora, 03. meje 2016 spisane wot:

Karlsruhe (B/SN). Zetkanje z wjace hač 14 000 wobdźělnikami planuja cyrkwje w Karlsruhe. Składnostnje młodźinskeho zjězda Christival 2016 wot 4. do 8. meje chce dźěłowe zjednoćenstwo křesćanskich cyrkwjow (ACK) 7. meje wuhotować wječorny piknik za Christival a za jeje wobdźělnikow a hosći na Karlsruheskej hrodowej zahrodźe. To rjekny tamniši ewangelski dekan Thomas Schalla. Młodźinske zetkanje steji pod hesłom „Jězus wujednawa“. Zjězd, za kotryž je so hižo wjace hač 13 000 młodostnych nad 14 lětami přizjewiło, ma „wobdźělnikam zmóžnić, zo rěča wo prašenjach wěry a žiwjenja ze swojeje perspektiwy a wuwiwaja nowe formy křesćanskeho młodźinskeho dźěła“. Posledni Christival wotmě so lěta 2008 w Bremenje.

Bamž pućuje do Kawkaza

Vatikan (B/SN). Wot 24. do 26. junija wopyta bamž Armensku, wot 30. septembra do 2. oktobra Azerbajdźan a Georgisku. Jězbu do Armenskeje zwjazuje, chcyjo nochcyjo ze spominanjom na přesćě­howanje Armenjanow přez Osmaniske mócnarstwo před 100 lětami.

Přećiwo neutraliće cyrkwjow

To a tamne (03.05.16)

wutora, 03. meje 2016 spisane wot:

Ze styskom za swojimi přećelemi je dwanaćelětny hólc samlutki z durinskeho Erfurta do Pólskeje pućował, zadźeržujo awta. Tam jeho 22lětny šofer awta wuhlada a přepoda pachoła policistam. Jim hólc rozłoži, zo bě njedawno ze staršimaj z Opola do Erfurta přećahnył. Tam pak so jemu za swojej pólskej domiznu a za přećelemi styskaše. Mjeztym wšak je zaso pola swojeju staršeju.

W kurioznej zwadźe wo předań praženych kołbaskow při awtodróhowym hosćencu su so dźensa sudnicy Geraskeho sudnistwa wosobinsce na městno konflikta při A 9 podali. Předawanska dowolnosć tamnišeho hosćenca Rodaborn južnje Hermsdorfskeho křiža bě wotběžała, na čož před nim dwaj metraj wysoki płót nastajichu. Wot toho časa kołbaski šoferam přez płót předawaja. Sudnicy pak rozsudźichu, zo je tole njezakonske.

We Łužicy měli mjez sobu solidarniši być

póndźela, 02. meje 2016 spisane wot:

Pod hesłom „Chwile za wjace solidarity“ je Němski zwjazk dźěłarnistwow (DGB) mejske swjedźenje składnostnje dnja dźěła wčera w Budyšinje, Zhorjelcu a Běłej Wodźe wuhotował. Na Wojerowski mejski swjatk bě tradicionalnje Lěwica přeprosyła. Serbski zapósłanc Sakskeho krajneho sejma Hajko Kozel (Lěwica) je so tam k rozsudej Zhorjelskeho statneho rěčnistwa wuprajł.

59 policistow zranjenych

póndźela, 02. meje 2016 spisane wot:

Berlin (dpa/SN). Při namócnosćach w zwi­sku z demonstracijemi lěwicarskich ekstremistow je so wčera w Berlinje-Kreuzbergu po informacijach dźěłarnistwa 59 po­licistow zraniło. Wo „měrniwej 1. meji njemóže tuž žana rěč być“, zdźěli městopředsyda Dźěłarnistwa policije (GdP) Detlef­ Herrmann nowinarjam. Zranjenja přez kamjenje a bleše drje běchu pře­wažnje snadne, přiwšěm njeměli so přiběrace ličby rjane barbić, wón rjekny. Loni 1. meje bě so 39 policistow zraniło.

Mjenje ćěkancow přišło

Athen (dpa/SN). Prud ćěkancow z Turkowskeje do Grjekskeje je dale słaby. Wot njedźele ranja hač do dźensnišeho ranja je runje 112 ćěkancow z Turkowskeje do Grjekskeje přišło, kaž z Athena in­formowachu. Hišće w februaru běchu tam wšědnje 2 000 ćěkancow zličili. Z nowym zrěčenjom mjez EU a Turkowskej z 20. měrca smě Grjekska ilegalnych ćěkancow do Turkowskeje wróćo słać. Dotal je to w 400 padach činiła.

Kontrole na mjezy podlěšene

Přistajeni Budyskeje twornje kanadiskeho wagonotwarca Bombardier su dźensa za wyše­ mzdy stawkowali. Dźěłarnistwo IG metal žada sej w tuchwilnych tarifowych jednanjach pjeć procentow wjace pjenjez. Z hodźinu trajacym warnowanskim stawkom dźěławi tute žadanje potwjerdźichu. Wone złožuje so na stabilne hospodarske wuměnjenja a na dobre wuhlady w branši, rěčnicy dźěłarnistwa zwuraznichu. Dźěłodawarjo žadanje dźěłarnistwa dotal wotpokazuja. Foto: SN/Maćij Bulank

Berlin (dpa/ch/SN). Nižozemska wotnožka organizacije Greenpeace je medijam dźensa cyłkownje 240 stron dotal tajneho jednanskeho teksta transatlantiskeho wikowanskeho dojednaja TTIP přewostajiła. Z dokumentow, kotrež nowinje Süddeutsche Zeitung kaž tež sćelakomaj WDR a NDR předleža, wuchadźa, zo knježerstwo USA Europu při jednanjach wjele sylnišo pod ćišć staja hač dotal znate. Greenpeace kritizowaše, zo Europje wikowanskeho dojednanja dla słabše wobswětowe standardy hroža. „Štož je so dotal z tychle tajnych jednanjow do zjawnosće předrěło, klinči kaž špatny són. Nětko wěmy, zo móhł so wón bórze zwoprawdźić“, zdźěli rěčnik Greenpeace.

Zeleno-čorne koaliciske zrěčenje

póndźela, 02. meje 2016 spisane wot:
Stuttgart (dpa/ch/SN). Koaliciske zrěčenje po cyłym Zwjazku prěnjeho zeleno-čorneho krajneho knježerstwa w Badensko-Württembergskej steji. Kaž powěsćernja dpa zhoni, je so wulke jednanske koło Zelenych a CDU wčera w Stuttgarće na naćisk dojednało. Wotum stronskeju zjězdow Zelenych a CDU pak hišće njepředleži. CDU zetka so pjatk na stronski zjězd, sobotu Zeleni. Na wólbach krajneho sejma 13. měrca běchu so Zeleni prěni króć w Němskej z najsylnišej politiskej mocu stali. Zeleno-čorny zwjazk ma ministerski prezident Winfried Kretsch- mann nawjedować. CDU je prěni króć w Zwjazkowej republice Němskej partner w krajnym knježerstwje ze Zelenymi.

Tež mjeńšinyw programje AFD

póndźela, 02. meje 2016 spisane wot:

Stuttgart/Budyšin (dpa/SN/MkWj). Na swojim kónctydźenskim stronskim zjězdźe je Alternatiwa za Němsku (AfD) swój prěni stronski program wobzamknyła. Něhdźe 2 000 delegatow zakótwi w nim zasady politiskeho dźěła. Tam steja sady kaž „Islam njesłuša do Němskeje“ abo „Němska wodźaca kultura město multikulturalizma“. Stronje pobrachowaše wot jeje załoženja w lěće 2013 program.

W prašenju ćěkancow delegaća wosebje dołho diskutowachu. Spočatnje chcychu migraciju z „cuzych kulturnych kruhow“ do Němskeje dospołnje zakazać. Na kóncu so dojednachu, zo dyrbjeli wukrajni­ fachowcy po přikładźe Kanady do Němskeje přińć směć.

Reakcije na zjězd strony AfD běchu zdźěla razne. Generalny sekretar CDU Peter Tauber kritizowaše, zo chcyła AfD wróćo k Němskej, kotraž wšak w tej formje nihdy eksistowała njeje. „To njeje konserwatiwne, to je reakcionarne“, rjekny Tauber­ nowinarjam. Generalnej sekretarce SPD Katarinje Barley je zjězd dopokaz, kak „njemoderna a zastarska“ AfD je. Centralna rada Židow je sej wěsta, zo Alternatiwa za Němsku ze swojimi pozicijemi samo wustawu rani.­

To słuša do zjawnosće

póndźela, 02. meje 2016 spisane wot:
Na sprawnosć a solidaritu njejsu rěčnicy wčera na mejskich swjedźenjach jeničce we Łužicy apelowali. Namołwa němskim a serbskim wobydlerjam, mjez sobu solidarniši być, pak bě jenož we Wojerecach słyšeć. Tak steješe njedawny rozsud Zho­rjelskeho­ statneho rěčnistwa, nadběhi na serbskich­ młodostnych chłostanskoprawnisce dale njesćěhować, hišće raz w srjedźišću. Argumentacija statnych rěčnikow ze serbskeho wida njepřeswědča. Wo wjele hórše pak je to, štož nětko myslenje po­trje­chenych młodych Serbow postaja: Zakitowarjo prawniskeho stata njespóznawaja brizantnosć pada, přicpěwaja jemu skerje raz „wjesneje bijeńcy“. To njeje jeno serbska naležnosć, ale znajmjeńša łužiska, skerje pak cyłeje towaršnosće. Tohodla bě prawje, zo je Hajko Kozel tole 1. meje we Wojerecach zjawnje tematizował. Tohodla­ je wažne, zo su Němcy a Serbja mjez sobu solidarni. Axel Arlt

Budyšin (SN/MkWj). Skupina senatorow z Čěskeje republiki je minjeny pjatk Łužicu wopytała. Hłowny zaměr jězby politikarjow bě so bliže z kónčinu zeznajomić, kotraž je mnohim z nich jenož „marginalnje“ znata, kaž ze zdźělenki Budyskeho krajnoradneho zarjada wuchadźa. Tón bě wopyt čěskich hosći přihotował, po tym zo bě senator Jiří Vosecký w februaru pola krajneho rady Michaela Hariga (CDU) pobył. Senatorojo přisłušeja dźěłowej skupinje, zaběracej so wosebje z regionalnym wuwićom a z móžnosćemi spěchowanja, kotrež so w pomjeznej kónčinje z pomocu wotpowědnych programow Europskeje unije skića. Z wulkim zajimom sćěhowachu čěscy hosćo tuž přednošk 1. přirjadnika krajneho rady, něhdyšeho Łazowskeho wjesnjanosty Uda Wićaza, wo Budyskim wokrjesu.

Chróšćan Šulerjo

nowostki LND