Budyšin (CS/SN). Čehodla su runje w Sakskej wobydlerske protesty a populizm tak zakótwjene? Tomu prašenju wěnowaše so wčera profesor sociologije Raj Kollmorgen z Wysokeje šule Zhorjelc/Žitawa w přednošku. Něhdźe 50 zajimcow bě do Budyskeho Kamjentneho domu přišło.

Nošerki pjenkatych črijow su same wina, hdyž so ze swojimi črijemi na někajkich widźomnych zadźěwkach kopola. Tole je wyše krajne sudnistwo we westfalskim Hammje rozsu­dźiło. Lěta 2014 bě žona před dźiwadłom města ze swojimi 4,5 centimetrow wysokimi pjenkami w dźěrkach gumijoweje maty wisajo wostała a sej nohu złamała. Dokelž bě dołhi čas chora, žadaše sej wot města 2 000 eurow wotškódnjenja.

Mylić dał njeje so paduch w Ulmje, hdźež bě so přez njezamknjene durje do bydlenja­ žony dóstał. Wona wotući, jako muž do spanskeje stwy zastupi. Najprjedy wšak sej wobydlerka mysleše, zo je to jeje mandźelski; jako pak zadoby­warja narěča, so tón cyle jednorje wobroći, durje začini a w bydlenskej pilnje dale pytaše. Hakle jako žona za nim přińdźe a wótře na njeho wołaše, paduch ćekny.

Berlin (SN). We wobłuku FUEN-kongresa we Wrócławju je so mjeńšinowa rada Němskeje ze społnomócnjenym zwjazkoweho knježerstwa za prašenja wusydlencow a narodne mjeńšiny, zapósłancom zwjazkoweho sejma Hartmutom Koschykom (CSU), zetkała. W rozmołwje přihotowachu debatu zwjazkoweho sejma wo tym, kak zwoprawdźić zakładnu papjeru „Charta-rěče w Němskej – zhromadna zamołwitosć“. Debata ma so hišće w tutej wólbnej periodźe přewjesć, kaž mjeńšinowy běrow zdźěli.

„Jara dobra kooperacija z knjezom Koschykom a jeho iniciatiwa, debatu nanajpozdźišo 2017 zwoprawdźić, nas zwjesela. Je to wažny měznik našich prócowanjow, škit mjeńšinowych rěčow a regionalneje rěče delnjoněmčiny jako wšotowaršnostny nadawk etablěrować“, rjekny předsyda mjeńšinoweje rady Jon Hardon Hansen. Tež w Zwjazkowej radźe chcedźa debatu forsěrować. Aktualnje diskutuje mjeńšinowa rada wo tym, rozšěrić paragraf 184 zakonja wo rěči před sudnistwom, kotryž Serbam hižo zaruča serbšćinu nałožować.