BSW namjetej AfD přihłosuje
Drježdźany (dpa/SN). Dwaj a poł měsaca po wólbach krajneho sejma pytaja w Sakskej přeco hišće za móžnej knježerstwowej koaliciju. Wčera stej CDU a SPD wo wutworjenju mjeńšinoweho knježerstwa rěčałoj. Přichodnu wutoru chcedźa zapósłancy čłonow přepytowanskeho wuběrka koronakrizy dla wolić. Nimo toho dyrbi parlament wo próstwach AfD a Lěwicy nastupajo planowane nastajenje nowych raketow USA w Němskej a wo wojerskim slědźenju na wysokich šulach Němskeje wothłosować.
Za Zwjazk Sahry Wagenknecht (BSW) a za Lěwicu je to łoskoćiwa tema. „Strony přesahowaca měrowa iniciatiwa“ w krajnym sejmje je tak móžna, w dokumenće rěka. Tež Lěwicarjo, kotřiž poprawom kóžde zhromadne dźěło z AfD wotpokazuja, su we wuskosćach. Woni běchu swój čas sami namołwu zapodali, po kotrejž měło so krajne knježerstwo přećiwo nastajenju raketow zasadźeć.
Frakcija BSW připowědźi, zo chcyła namjetej AfD raketow dla přihłosować, wšako je rakety stajnje wotpokazała.
Sypnjeny móst dale wužadacy
To a tamne (15.11.24)
Jeno spódnju drastu woblečeny je so šofer nakładneho awta na awtodróze 70 njedaloko bayerskeho Bamberga sam wuzamknył. Dokelž tež mobilny telefon w kabinje ležeše, wołaše muž nuzowu pomoc. Při temperaturach wokoło nule smědźeše so 54lětny w policajskim awće woćoplić, doniž pomocna słužba awto njewotamkny. Što muž w spódnich cholowach na dróze chcyše, njeje znate.
W kostimje mjedwjedźa su jebarjo spytali, awtowu zawěsćernju wobšudźić. W Kaliforniskej prezentowachu pozdatne widejo awtomatiskeje kamery, kotraž pokazuje, kak so mjedwjedź do parkowaceho awta zadobudźe a z pazorami sedła rozdrapa. Fachowc za dźiwje zwěrjata pak jebanstwo spózna. W bydlenju namaka policija kostim a rězniske hoki. Wobšudnicy chcychu 133 000 eurow wuzbytkować. Policija skućićelow zaja.
Poslednje dny w nazymje měli za pućowanje wužiwać a so nad ...
Nowy wonkowny minister USA
Washington (dpa/SN). Republikanski senator ze zwjazkoweho stata Floridy Marco Rubio ma w knježerstwje USA pod nawodom Donalda Trumpa zastojnstwo wonkowneho ministra přewzać. Tole je přichodny prezident Trump připowědźił. „Marco je wulce nahladna a nawjedowaca wosobina kaž tež sylny hłós za swobodu“ steji w dokumenće Trumpa. 53lětny Rubio je wot lěta 2011 dźěl senata USA a bě 2016 podarmo spytał, so sam z kandidatom republikanow za prezidenta stać.
Israelscy wojacy padnyli
Tel Aviv (dpa/SN). Při wojowanjach na juhu Libanona su po informacijach israelskeje armeje šěsć wojakow morili. Woni su při třěleńcy z wojowarjemi milicy Hisbollah w twarjenju swoje žiwjenje přisadźili, israelske medije rozprawjeja. Dalši wojak so při rozestajenju zrani. Na wopomnjenskej stronje wójska za padłych wojakow je ličba tych, kotřiž su wójny w Gazaskim pasmje a w Libanonje dla zemrěli, na 792 rozrostła.
Zdźědźenje statokow rjadować
Z wotmachom přihotuja tež w Choćebuzu lětuše dohodowne wiki. Na ...
Ruska dalše kónčiny zdobyła
Kijew (dpa/SN). Ruske wojerske jednotki po informacijach ukrainskich wójnskich wobkedźbowarjow na wuchodźe Ukrainy dale postupuja. Njedaloko wohroženeho a mjeztym zničeneho města Kurachowe w kónčinje Donjecka su sebi ruske jednotki dalše areale zdobyli. Nimo toho měrja so dale na Kupjansk w sewjernej Charkowskej kónčinje. Ofensiwu pak su ukrainske jednotki wotwobarali, generalny stab w Kijewje zdźěla. Kupjansk je wažny strategiski železniski centrum.
Mjeztym je ukrainski prezident Wolodymyr Zelenskyj ze zwjazkowym kanclerom Olafom Scholzom (SPD) telefonował a jeho wo dalšu wojersku pomoc prosył. Ukraina trjeba wosebje wjace lětadła wotwobarace systemy.
Haldenwang wuwjazany
Dialog EU z Israelom přetorhnyć?
Brüssel (dpa/SN). Hłowny diplomat EU Josep Borrell namjetuje statam Europskeje unije, prawidłowny politiski dialog z Israelom přetorhnyć. Hłowna přičina su rozprawy njewotwisnych mjezynarodnych organizacijow, kotrež wo tym rozprawjeja, zo Israel čłowjeske prawo a mjezynarodne čłowjeske ludowe prawo rani. Tole je powěsćernja dpa z kruhow zastojnikow EU zhoniła. Namjet Borrella chcedźa na přichodnym zetkanju wonkownych ministrow EU wobjednawać, kotrež wotměje so přichodnu póndźelu.
Politiski dialog z Israelom rjaduje tak mjenowane asociěrowanske zrěčenje z lěta 2000. Tute předwidźi mjez druhim prawidłownu wuměnu za skrućenje poćahow a za dalše wuwiće partnerstwa. W nim zakótwjeny je tež zawjazk, zo wobě stronje čłowjeske prawa a zasady demokratije dodźeržitej.
Borrell bě hižo w oktobru připowědźił, zo chcył z wonkownymi ministrami EU wo wójnskim postupowanju Israela w Gazaskim pasmje a w Libanonje rěčeć. Tam ćerpja wosebje ciwilisća.
Merz Scholzej wumjetował
Razna debata zwjazkoweho sejma po narěči zwjazkoweho kanclera
Berlin (dpa/SN). Tydźeń po zwrěšćenju amploweje koalicije je nawoda opozicije Friedrich Merz razne wosobinske nadběhi přećiwo zwjazkowemu kanclerej Olafej Scholzej (SPD) w zwjazkowym sejmje zwuraznił. Z tym je wólbny bój zahajił. Předsyda CDU a kanclerski kandidat unije CDU/CSU w swojej wotmołwje na knježerstwowu deklaraciju Scholzej kompetencu nawjedowanja wotrjekny. „Wy tutón kraj pačiće, knježe kanclero. Wy sće za tute rozestajenja a za pačenje Němskeje zamołwity. Takle njemóže nichtó kraj nawjedować“, wón rjekny.
Scholz bě do toho w knježerstwowej deklaraciji pušćenje financneho ministra Christiana Lindnera (FDP) a z tym zwisowacy kónc amploweje koalicije SPD, Zelenych a FDP jako „njewobeńdźomne“ zakitował. Runočasnje warnowaše před pačenjom kraja a namołwješe wšitkich, kompromisy tworić. „Sym přeswědčeny, zo je to jenički prawy puć“, tak Scholz.
