Za katastrofu ze zranjenymi a mortwymi zwučowali
Choćebuz (MH/SN). W parku Sprjewineje łučiny w Choćebuzu su minjeny pjatk wobšěrne zwučowanje přewjedli. Sta pomocnikow měješe nadawk, cyłkownje 93 zranjenych posudźować, zastarać a do chorownje mediciniskeje uniwersity dowjezć. Na wšěch 500 ludźi bě zasadźenych, pak jako dźiwadźelnicy, pak jako wuchowarjo.
We wobłuku zwučowanja napodobnichu scenarij, zo dyrbja ćežkeho hrimanja dla wulkozarjadowanje z 5 000 wustróžanymi wopytowarjemi přetorhnyć. Błyski běchu tójšto ludźi „zranili“, kotřiž bjez orientacije po swjedźenišću błudźachu. Wšo tole nawodnistwo runje tak přichwatanych pomocnikow tež dušinje chětro poćežowaše. Na kóncu mějachu samo „smjertne wopory“ na starosći.
Při zwučowanju dalše jednotki wohnjowych wobornikow z juha Braniborskeje na pomoc wołachu. Tež helikopter bě zasadźeny. Techniski pomocny skutk a nuzowi dušepastyrjo běchu runje tak aktiwni kaž wšelake wurjadne jednotki katastrofoweho škita, mjez nimi tajke, kiž ludźi z powětra zastaruja. Towaršnosć za wuchowanje žiwjenja na jězoru za „zhubjenymi“ pytaše.
To a tamne (08.07.25)
Žonje lěwu ruku wotkusnył je law w zwěrjencu w Brisbane w awstralskim zwjazkowym kraju Queensland. Rubježne zwěrjo bě 50lětnu žonu njejapcy nadpadnyło, jako wona druhich hladarjow při dźěle ze zwěrjatami wobkedźbowaše. Zwěrjenc njemóže sej ataku rozkłasć. Awstralčanka njebě w hajnišću rubježnych zwěrjatow. Prawdźepodobnje bě ju law přez dźěru w płoće kusnył. Žona bě nazhonita hladarka lawow.
Njewšědny přirodny spektakl skići tuchwilu indoneski wulkan Lewotobi Laki-Laki, po tym zo je znowa wudyrił. Na wšěch 18 kilometrow wysoko stupa hoberski stołp popjeła a kura. Wulkan bě wčera dopołdnja z wulkej eksploziju wudyrił. Wot toho časa pluwa krater horcy płun, popjeł, kamjeniska a lawu, kotraž jara spěšnje po kromje wulkana do doła ćeče. Wo woporach njeje ničo znate.
Antiksku cyrkej wotkryli
Rom (B/SN). Na historiskej, 2 300 lět starej dróze Via Appia su archeologojo w Tres Tabernae 50 kilometrow južnje Roma zbytki cyrkwje, wozdebjeneje ze srjedźowěkowskimi freskami, wotkryli. Tónle Boži dom móhł přebywanje japoštoła Pawoła w tej kónčinje wobkrućić. Městnosć Tres Tabernae jewi so w Nowym testamenće. Wottam běchu křesćenjo Pawoła k wotprawjenju přewodźeli.
Bamž z wjacorymi křižemi
Rom (B/SN). Bamž Leo XIV. wotměnjejo wjacore křiže na hrudźi nosy. Jedyn z nich hódnoći so jako ćiche ekumenisko-diplomatiske poselstwo w zwjazanosći z ortodoksiju a mjenuje so „Pawołski křiž“. Wón je so ze symbolom za dialog a nadźiju stał, z mostom mjez zapadom a wuchodom, mjez Romom a Moskwu, mjez zašłosću a přichodom. Křiž je wurazne znamjo uniwersalneje cyrkwje na zakładźe mjezsobneho respekta.
Strašna kritika
Alojs Andricki we wučbnym planje
Po šulskim zakonju „měli na wšěch šulach w Sakskej zakładne znajomosće wo stawiznach a kulturje Serbow posrědkować“ – tole je kultusowy minister Conrad Clemens (CDU) we wotmołwje na małe naprašowanje zapósłanca Rica Gebhardta (Lěwica) wuzběhnył.
Drježdźany (SN/mb). Krótko do wulkich prózdnin je wotmołwa ministra na štyri prašenja rěčnika frakcije Lěwicy za serbske naležnosće dóšła. Wone wěnowachu so temje „zakótwjenje prawa a škita mjeńšin we wučbnych planach za šule w Sakskej“. Jako přiłohu je minister přehlad wo serbskich temach w sakskich wučbnych planach podał. Tak měli na přikład šulerjo 3. lětnika w předmjeće etika wo swjatych dnjach katolskich Serbow zhonić. We wěcnej wučbje 4. lětnika steji dohlad do serbskeje kultury sobu na programje. Konkretnje dźe wo „regionalnu dwurěčnosć, žiwjenske wašnje, nałožki“. Po planje hudźby 4. lětnika podadźa so šulerjo na „muzikaliske pućowanje po Sakskej“, a nimo Rudnych hór a Bohotskeje słušatej k stacijam tury tež Łužica a Serbja.
Trump so Muskej směje
Washington (dpa/SN). Prezident USA Donald Trump je plany miliardara Elona Muska nastupajo nowu politisku stronu kritizował. „To je směšne“, rjekny Trump žurnalistam na wotpowědne prašenje. Třeća strona w USA by ludźi „jenož zamyliła“, wšako je jeho republikanska strona jara wuspěšna. Musk chce ze swojej stronu America tuchwilny system dweju stronow w USA změnić. Wón a Trump běštaj něhdy wusko spřećelenaj, mjeztym staj so dospołnje zwadźiłoj.
Reforma hladanja trěbna
Berlin (dpa/SN). Hladajo na trajace pjenježne starosće hladanskeho zawěsćenja ma dźěłowa skupina Zwjazka a zwjazkowych krajow namjety za zasadnu reformu zdźěłać. W koaliciskim zrěčenju CDU/CSU a SPD zakótwjeny gremij je so dźensa w Berlinje pod nawodom ministerki za strowotnistwo Niny Warken (CDU) k prěnjemu posedźenju zešoł. Dźěłowa skupina ma hišće lětsa prěnje wuslědki předpołožić. Hłownje dźe wo to, stupace popłatki wobmjezować.
Dźeń a wjace wotprawjenjow
Pólska kontrole mjezy zahajiła
Kraje BRICS nadpady zasudźa
Rio de Janeiro (dpa/SN). Staty zjednoćenstwa BRICS su na swojim wjeršku w Brazilskej wojerske postupowanje Israela w Gazaskim pasmje kaž tež najnowše nalěty na Iran jasnje kritizowali. Nadpady na Iran su „ranjenje prawa ludow a zasadow UNO“, rěka w zakónčacej deklaraciji, kotruž su hnydom prěni dźeń dwaj dnjej trajaceho zetkanja schwalili. Jědnaće čłonskich krajow zwuraznja swoje wulke starosće hladajo na humanitarne połoženje w Gazaskim pasmje, wosebje pobrachowace žiwidła a hłód mjez ludźimi.
BRICS symbolizuje spočatny pismik pjeć prěnich čłonow: Brazilskeje, Ruskeje, Indiskeje, Chiny a Južneje Afriki. Kraje chcedźa wot USA a zapada njewotwisny hospodarski zwjazk na juhu swěta być.
Zwjazk twarcow brónjow rozrosće
Berlin (dpa/SN). Rozmach brónjenskeje industrije po ruskim nadpadźe na Ukrainu je zwjazkej brónjenskich zawodow Němskeje wulku ličbu nowych čłonow wunjesł. „Mjeztym mamy w našim zwjazku wjace hač 340 čłonow, to je sto wjace hač kónc minjeneho lěta“, rjekny hłowny jednaćel cyłoněmskeho zwjazka wěstotneje a zakitowanskeje industrije Hans Christoph Atzpodien. Jako bě wón lěta 2017 swoje zastojnstwo nastupił, měješe zwjazk brónjenskich zawodow Němskeje runje 70 čłonow.
Nowi čłonojo proša wo poradźowanje, kak móhli w zwjazku zasłužić a kajke prawidła w tym zwisku płaća. Tójšto předewzaćow přińdźe z awtoweje branše, hdźež tuchwilu derje njeběži. Konkretne mjena nowych čłonow Atzpodien njemjenuje. Zawody so nadźijeja, zo dóstanu wot brónjenskeje industrije nadawk, dźěle za wojerske jězdźidła produkować.
Do toho dyrbja pak wšelake naroki ze stron zwjazkoweje wobory spjelnić: Twar brónjow sej mjez druhim žada, zo so krute prawidła potajnosće dodźerža.
Žołma stanowarjow překwapiła
Tójšto smjertnych woporow po katastrofje zapławjenja w Texasu
Kerrville (dpa/SN). Ličba wobkrućenych smjertnych woporow po katastrofje zapławjenja w zwjazkowym staće USA Texasu spochi přiběra. Wčera zamołwići ludźi warnowachu, zo móhło k dalšim zapławjenjam dóńć.
W dowolowej kónčinje na juhu USA bě pjatk rano zliwkow dla wulka woda nastała. Tójšto dźěći a dorosćenych je tam stanowało – nětko su mortwi.
68 smjertnych woporow su zamołwići dotal w kónčinje Kerr County zličili, kotraž bě wosebje sylnje potrjechena. Z mortwymi w druhich kónčinach wučinja ličba smjertnych woporow mjeztym cyłkownje něhdźe 80. Dokelž rozměr katastrofy ani hišće prawje njeznaja, móhła ličba woporow dale přiběrać.
