Zakitowar pokala lětsa jenož na štwórtym městnje
Tradicionalny halowy koparski turněr Hórčanskeho sportoweho towarstwa Zeleno-běli za hrajerjow staršich hač 35 lět je so lětsa znowa we Worklečanskej hali wotměł.
Šěsć přeprošenych mustwow hraješe po modusu kóždy přećiwo kóždemu. Zakitowar trofeje a zdobom faworit na pokal Zeleno-běłych běše kaž hižo minjenej lěće mustwo Sokoła Ralbicy/Hórki. Štóž chcyše potajkim delanskim koparjam trofeju wotewzać, njesmědźeše sej žanu poražku přećiwo nim dowolić. Sudnikaj René Čornak a Michał Nowak staraštaj so w napjatych hrach wo wobstajnu fairnosć.
Wosebje napadnył je wrotar Njebjelčanow, znaty lěkar Hubert Mička. Wón měješe podobnje čěskemu narodnemu wrotarjej Peterej Čechej škitny nahłownik. Kaž Čech je tež Mička na te wašnje koparjam wokoło trenarja Wolfganga Reinecki trěbne zbožo přinjesł, kotrež lětsa Ralbičanam popřate njebě. Tak dyrbješe faworit swój són wo titulowym hattricku po třoch njerozsudnych hrach pochować. Njebjelčenjo mějachu porno tomu po třoch partijach nimo dweju dobyteju hišće njerozsudnu na konće.
Na wrota bohata testowa hra
Biskopičanske KT 08
– Budissa Budyšin 4:4 (2:2)
Zestawa Budissy w prěnim połčasu: J. Jakubov – Kolan, Klippel, Pfanne, Čermák, Reher, Fröhlich, Heppner, Hansch, Heineccius, A. Jakubov;
w druhim połčasu: Große – Kolan, Klippel, Patka, Kral, Rosendo, Hoßmang, Hausdorf, Salewski, Walther, Hansch
Regionalny koparski ligist Budissa Budyšin je dalši test přewjedł, a to pola wyšeho ligista Biskopičanske KT 08. Hra wotmě so na kumštnym trawniku w Biskopicach. Něhdźe 50 ludźi dožiwi tam na wrota bohatu hru.
Trenar Budissy Tomaš Henčl měješe hač na Kunerta wšitkich koparjow k dispoziciji a da wšitkim šansu so prezentować. Hosćićelej drje poradźi so lěpši start. Frank Zille docpě 1:0 (8.), Chris Reher a Philip Heineccius pak namakaštaj z 1:1 (21.) a 1:2 (25.) prawu wotmołwu. Krótko po nawjedowanju hosća pak Beno Töppel za Biskopicy wuruna (29.).
Znowa Kulowminati wuspěšny
Wuhotowar a zarjadowar 3. koparskeho turněra Kulow-cup w zymje bě zdobom dobyćer lětnjeho turněra.
Na třećim turněrje Kulow-cup startowaše w Kulowskej wjacezaměrowej hali wosom koparskich cyłkow. Małe finale wuhraštej Company of Kulow a mustwo z mjenom Söffner. Třeće městno wobsadźi po dobyću 4:2 mustwo Söffner, štwórte Company of Kulow.
Tajka prawa napjatosć knježeše w kónčnej hrě mjez teamomaj DSF (Němsko-serbska frakcija) a Kulowminati. Tajny faworit Kulowminati, wobstejacy z młodych, 16lětnych karnewalistow, doby z 2:1. Wrota w finalu třělichu Johannes Wehlan, Jan Pfennig a Lukaš Koplanski.
K zakónčenju dnja přeprosychu sej dobyćerjo wšitkich koparjow turněra a dalšich hosći do rockoweje bróžnje na après-ski-party. Kulowminatije dźakuja so wšitkim pomocnikam a sponsoram za podpěru a za poradźeny 3. Kulow-cup.Werner Müller
Koparski turněr wo pokal TCM
Halowy koparski turněr wo pokal Towarstwa Cyrila a Metoda, kotryž wotmě so minjenu sobotu w Chrósćicach, je prěnje mustwo z Wotrowa dobyło.
Halowy koparski turněr wo pokal TCM je Wotrowske prěnje mustwo dobyło. W finalu přesadźi so wone 3:1 přećiwo Lacio Chrósćicam, kotrež mějachu z Janom Boguszom najlěpšeho hrajerja w swojich rjadach. Jako najwustojniši třělc wrotow bu Chróšćan Filip Šołta počesćeny, najlěpši wrotar bě Oliver Schmidt, kiž škitaše Wotrowske wrota. Małe finale doby Puklot Chrósćicy 3:2 přećiwo Chrósćicam II a duel wo 5. městno Viktoria Worklecy přećiwo Wotrowej II z 1:0.
W skupinje I hrajachu Wotrow – Lacio Chrósćicy 2:1, Wotrow – Viktoria Worklecy 2:0 a Lacio Chrósćicy – Viktoria Worklecy 5:0. Dalše tři cyłki wubědźowachu so w skupinje II: Wotrow II – Puklot Chrósćicy 0:5, Wotrow II – Chrósćicy II 0:3 a Puklot Chrósćicy – Chrósćicy II 1:1.
Hłownaj sudnikaj turněra běštaj Guido Zahrodnik a Chrystof Zahrodnik. Wubědźowanje zarjadowało a přewjedło běše Towarstwo Cyrila a Metoda zhromadnje ze Sportowej jednotku Chrósćicy. Jan Hrjehor
Mustwo ST Ćisk RB-cup dobyło
Pjaty raz bě třeću sobotu januara dobyćer koparskeho turněra wo pokal firmy Richter twarske elementy,
RB-cup, pytany.
Volleyballistki SGB znowa w sakskim finalu
W swójskej hali dobychu volleyballistki Serbskeho gymnazija Budyšin (SGB) regionalne finale starobneje skupiny III pod hesłom „Młodźina trenuje za olympiju“. Hižo třeći raz docpěchu holcy, kotrež widźimy na wobrazu, kónčne sakske wurisanje. Wone budźe 17. měrca w Dippoldiswaldźe.
Minjenu srjedu krótko do 9 hodź. wotewrě šulski nawoda SGB René Wjacławk regionalne volleyballowe finale holcow a hólcow štyrjoch najlěpšich šulow wuchodneje Sakskeje w sportowni Serbskeho šulskeho a zetkawanskeho centruma Budyšin. Šěsć hodźin pozdźišo radowaše so wón nad wospjetnym rjanym wuspěchom holcow SGB. Tež sobušulerjo mjeńšich lětnikow so jako sylny fanowy blok z nimi wjeselachu a dźiwachu so, kak wuběrnje zamóža gymnaziastki-volleyballistki při wysokim saku z bulom wobchadźeć.
Serbski gymnazij Budyšin
– Wyša šula Kulow 2:0
Tež wubranka žonow so přihotuje
Chcedźa rady w načolnej skupinje wostać
Krajny koparski ligist Jednota Kamjenc startuje jutře z přihotami na druhu połseriju.
Mustwo z Lessingoweho města chce poziciju w načolnej skupinje krajneje ligi dźeržeć a toho abo tamneho faworita na mišterstwo dale mjerzać. Wosebje škit je so w 1. połseriji we wulkotnej formje prezentował. Koparski cyłk bu w 16 dypkowych hrach jenož jónu poraženy, a to w Riesy, hdźež podleža tamnišemu mustwu z 1:0. Tuchwilu steji Jednota Kamjenc w sakskej krajnej koparskej lize na 3. městnje tabulki. Tež w sakskim pokalu je mustwo trenarja Franka Ričela jara wuspěšne. Tam čaka na njón w połfinalu regionalny ligist FSV Zwickau. Hrać budu po dotalnym stawje sobotu, 26. měrca, w Kamjencu.
Po tym zo bě so mustwo wuspěšne na halowymaj turněromaj w Kamjencu a Budyšinje wobdźěliło, chce wone nětko z połnej koncentraciju trenować započeć a swoje wukony skrućić. Na personalnym polu so ničo wulce njezměni. Wopušćił je Jednotu čěski kopar Martin Finklar, kiž bě dotal hłownje w druhim mustwje zasadźeny.
Wubranka so přihotowała
Treningowe lěhwo serbskich koparkow w Bedřichovje
Tydźenja bě Serbska koparska wubranka muži za lětušu europeadu w Južnym Tirolu trenowała, a to w Breitenbrunnje na horje Rabenberg. Kónc tydźenja nětko přihotowachu so žony wubranki na wulki koparski podawk w juniju. Wone wuzwolichu sej zymski sportowy areal w čěskim Bedřichovje njedaloko Libereca. Pjatk wječor poda so 14 młodych holcow a žonow z transporterami a priwatnymi awtami do Jizerskich horin. W rjanej zymskej wokolinje maš wjele móžnosćow, so ćělnje a dušinje na wulki event přihotować. Nawod treningoweho lěhwa měještaj trenarjej Handrij Rachel z Noweje Wjeski a Pětr Bejmak z Miłoćic. Jeju podpěrałoj staj Bejmakec bratraj Florian a Křesćan. Hišće pjatk wječor zahaji so třidnjowske koparske lěhwo z treningom na kumštnym trawniku. Wosebite wužadanje bě treningowa jednotka w sněze. Sobotny plan wopřiješe rańši běh, sněhakowanje po dołhich čarach, płuwanje a trening w hali. Při wšěch napinanjach běchu wšitke koparki jara motiwowane, sportowy pensum tak derje kaž móžno zmištrować.
Prěnju poražku poćerpjeli
Hubjene powěsće kopjachu so mjez volleyballistami ST Marijineje hwězdy do prěnjeho hrajneho dnja noweho lěta we wokrjesnej klasy muži. Třo hłowni nadběhowarjo wotzjewichu so chorosće dla. Runje, hdyž wočakowachu klóšterscy hrajerjo sylneju přećiwnikow Budyšin-sewjer a VV Biskopicy. Tak běchu wuhlady na dobyće skerje snadne.
Marijina hwězda – Budyšin-sewjer 1:2 (23:25, 29:27,13:15)
